Il-Prim Ministru Robert Abela illum ħabbar pjan ta' rilaxx ta wħud mill-miżuri li kien ħa lura f'Marzu - li hekk kif żvelat il-gazzetta ILLUM nhar il-Ħadd li għadda se jfisser il-ftuħ tal-iskejjel l-ewwel u wara se jseħħ il-ftuħ tal-ħwienet li joffru servizzi mhux essenzjali - jiġifieri ħwienet ta' sbuħija, xagħar, ħwejjeġ u żraben - fost oħrajn.
Ara hawnhekk d-dettalji tar-rilaxx tal-miżuri spjegati pass, pass.
Waqt il-konferenza tal-aħbarijiet f'Kastilja - apparti li tħabbru l-miżuri - sar aċċenn qawwi ħafna fuq il-kawtela u l-fatt li l-miżuri ta' rilaxx tħabbru b'mod gradwali u anke aċċenn fuq il-bżonn li l-pajjiż ikollu staġun tas-sajf u numri li jibgqħu baxxi, sabiex Malta tattira t-turisti.
Is-Supretendent tas-Saħħa Pubblika ċċarat li dawn il-passi ttieħdu għab-bażi tax-xjenza iżda wissiet: "Jekk naraw li miżura qed twassal għal żieda qawwija fil-każi jew fin-nies li jkollhom jiddaħħlu l-ITU nerġgħu nissikkaw il-miżuri."
"Dan huwa pjan ibbażat fuq ix-xjenza. Dan huwa pjan li qed nagħmlu moniteraġġ tiegħu, huwa pjan ta' kawtela u jekk l-affarijiet ma jkunux sejrin tajjeb nirrevedu," qalet Gauci. "Se nkomplu għaddejjin bi screening ta' gruppi, nissorveljaw il-każijiet fil-komunità u naraw ukoll kemm ikun hemm nies li jidħlu l-Isptar."
Gauci fakkret illi l-iskejjel se jkunu qed jiftħu skont il-miżuri u bl-iddistanzjar, apparti li tħabbar ukoll li l-iskejjel se jiftħu fuq medda ta' ġimgħa għal-livelli tal-primarja u sekondarja.
'Kieku morna għal lockdown ta' xi xahar konna nkissru lill-familji u negozji'
Il-Prim Ministru Robert Abela fakkar illi għal kull perjodu differenti, se jkun hemm bżonn miżuri differenti. "Hemm negozji u impjegati li qed ibatu, iva - imma qed nagħmlu sagrifiċċju biex ikollna sajf u sabiex jinżamm il-bilanċ bejn il-protezzjoni tal-ħajjiet u anke tan-negozji."
Huwa saħaq illi l-Gvern ma marx għas-soluzzjonijiet li kienu jfissru lockdowns ta' xahar, "kieku konna inkissru lin-negozji u ntellfu l-ħobża ta' kuljum tal-Maltin u l-Għawdxin."
Huwa fakkar li bħalissa għaddej proċess ta' vaċċinazzjoni, b'219,161 doża totali sal-bieraħ u 60,096 persuna li ħadet ukoll it-tieni doża. Fil-fatt Malta bħalissa tinsab fuq quddiem fil-proċess, ras għal ras, meta mqabbla mal-pajjiżi tal-UE.
Il-PM qal illi l-priorità tal-Gvern hija l-edukazzjoni, is-saħħa u l-anzjani u dan ir-rilaxx jirrifletti proprju dan.
Intant anke d-Deputat PM u Ministru tas-Saħħa Chris Fearne saħaq li l-mira tal-Gvern tibqa' Ġunju, meta l-Gvern qed jara li l-pajjiż jerġa' jiftaħ bil-mod, il-mod għat-turiżmu.
"Irridu niftħu t-turiżmu. Jekk nipperikolaw dan - u pajjiż bħar-Renju Unit ma tagħmilniex fil-Green List tagħha nitilfu s-sajf. Jekk nibqgħu sejrin kif aħna, inkunu fuq il-Green List Ewropea. Jekk le, l-ekonomija ma tirrankax."
