In-numru ta' nies li ħadu t-tieni vaċċin issa qabeż id-19,000 filwaqt li t-total ta' dożi li ngħataw sa issa kważi laħaq is-60,000 - preċiżament 59,702 doża. Is-Supretnedent tas-Saħħa Pubblika Chamaine Gauci qalet illi dan ifisser li l-pajjiż qed jagħti medja ta' 2,000 doża tal-vaċċin kuljum, mill-għażliet li għandha Malta sa issa: Pfizer, Moderna, AstraZeneca.
Lil dawk l-Għawdxin li rċevew appuntament f'Malta Gauci appellat biex jinjoraw l-appuntament għall-vaċċinazzjoni peress li se jintbagħat ieħor li se jsir fl-istess gżira.
Gauci fakkret ukoll illi bħalissa bdew jintbagħtu l-ittri lil eluf ta' nies vulnerabbli sabiex dawn jibdew jieħdu l-vaċċin. Hija elenkat dawn il-ħaddiema u appellat biex in-nies ma jċemplux jekk għadhom ma rċevewx l-ittra għaliex din se jirċevuha fil-ġimgħat li ġejjin. Fost dawk li qed jirċievu l-ittra għat-tilqim hemm: Persuni li jbatu mid-Dijabete, persuni b'immunità baxxa, dawk li jieħdu trattatamenti għall-kanċer, dawk li jbatu minn mard tal-qalb u persuni bi problemi respiratorji.
Is-Supretendent tas-Saħħa Pubblika ħabbret ukoll illi dawk it-tfal vulnerabbli li għalissa ma jistgħux jingħataw it-tilqima, se tingħata lil-ġenituri tagħhom minflok, biex għalissa jonqos iċ-ċans li jgħadduha lit-tfal tagħhom.