Grupp ta' organizzazzjonijiet li jirrappreżentaw lin-nisa saħqu kif filwaqt li hemm nisa li jagħżlu li jaħdmu fl-industrija tas-sess, dawn huma minoranza u l-maġġoranza assoluta huma nisa sfurzati fil-prostituzzjoni.
Propju għalhekk li emPOWer wera t-tħassib tiegħu dwar l-aħħar kummenti tas-Segretarju Parlamentari Rosianne Cutajar meta qalet li l-Gvern qed jaħdem u se jibqa' jaħdem fuq din ir-riforma biex il-prostituzzjoni tkun dekriminalizzata.
Fi kliem emPOWer, dan se jkollu effett dirett negattiv fuq il-ħajja ta' dawn in-nisa vulnerabbli li digà huma maqbuda fl-industrija.
"L-Onorevoli Cutajar jmissha qiegħda fuq quddiem biex tipproteġi lil dawn in-nisa," komplew jisħqu l-organizzazzjonijiet.
Qalu wkoll li mhuwiex minnu li l-organizzazzjonijiet li jirrappreżentaw lin-nisa tpoġġew fiċ-ċentru ta‘ din ir-riforma, anzi insistew li l-parir tagħhom ġie kompletament injorat.
Il-pożizzjoni ta' dawn l-organizzazzjonijiet u qablet magħha wkoll il-President Emeritu Marie Louise-Coleiro Preca, huwa li l-pajjiż jimxi fuq il-mudell Nordiku, li jiddikriminalizza l-prostituti iżda jinkrimina lil min jixtri s-servizz tagħhom.
F’dan ix-xenarju, ikomplu jgħidu l-organizzazzjonijiet, il-ħaddiema tas-sess ikollhom iċ-ċans li jfittxu l-għajnuna jekk ikunu jridu.
"Dawn in-nisa ma għandhomx għaliex iħallu l-għażliet tagħhom f’idejn min iħaddimhom, li wara kollox, għandhom f’moħħhom biss l-aġenda tagħhom, li assolutament ma tipproteġix id-drittijiet u l-interessi ta‘ dawn in-nisa," insistew.
emPOWer tifforma parti minn koalizzjoni ta‘ aktar minn 46 NGO.
L-Għaqdiet li jifformaw emPOWer huma:
- Business & Professional Women - BPW (Valletta) Malta
- Federation of Women Entrepreneurs
- Malta Association of Women in Business
- Malta Foundation for the Wellbeing of Society
- Malta Girl Guides
- Movement Nisa Partit Nazzjonalista
- National Council of Women
- Soroptimist International Malt
- Women Directors in Malta
- Young Women Christian Association
