Ilbieraħ filgħaxija, il-linja nazzjonali tal-ajru, l-Air Malta, wasslet Malta l-ewwel dożi tal-vaċċin ta’ Moderna kontra l-Covid-19.
Aktar konsenji mistennija jaslu fil-ġimgħat li ġejjin hekk kif skont id-Deputat Prim Ministru u Ministru għas-Saħħa Chris Fearne, Moderna se tibda tibgħat il-vaċċin kull ħmistax sakemm tkun bagħtet xejn inqas minn 100,000 doża.
Dan kien it-tieni vaċċin li ġie approvat mill-Aġenzija Ewropea għall-Mediċina.
Fi stqarrija, l-Air Malta spjegat kif kienet ilha xhur tipprepara biex tkun tista’ twassal Malta l-vaċċin kontra l-Covid-19 u għal dan kellha tirċievi ċ-ċertifikazzjoni kollha neċessarja filwaqt li taġġorna l-operat u l-proċeduri tagħha.
Dawn il-bidliet waslu biex l-Air Malta setgħet tuża l-ispazju li normalment jimtela’ mill-passiġġiera biex tkun tista’ ġġorr tagħmir umanitarju u mediku b’mod sigur.
“Ninsabu kburin li aħna parti minn din il-ħidma globali biex jitwassal il-vaċċin u ngħinu lill-gżejjer tagħna biex tikseb l-immunita kontra dan il-virus li kkawża ħafna ħsara,” saħaq iċ-Chairperson Eżekuttiv, David G. Curmi.
Apparti minn hekk, f’dawn l-aħħar xhur, Malta waslet aktar minn 2,600 tunellata ta’ merkanzija, inkluż mediċina, vaċċini, ilbies protettiv għall-infermiera u oħrajn.