Dawk li mietu waqt li kienu pożittivi għall-Covid-19 jitilgħu għal 58 ... Jitilfu ħajjithom żewġ persuni oħrajn

Il-Ministeru għas-Saħħa ħabbar li żewġ persuni oħrajn mietu waqt li kienu pożittivi bil-Covid-19 biex issa n-numru ta' dawk li mietu waqt li kienu pożittivi għal dan il-virus tela' għal 58.

Fl-ewwel każ, anzjan ta’ 82 sena ddaħħal l-isptar Mater Dei fil-25 ta’ Settembru u kien ikkonfermat pożittiv għall-Covid-19 fis-26 ta’ Ottubru. Huwa miet ilbieraħ fl-isptar Mater Dei.

Fit-tieni każ, raġel ta’ 66 sena kien ikkonfermat pożittiv għall-Covid-19 fl-1 ta’ Ottubru u ddaħħal l-isptar Mater Dei fit-8 ta’ Ottubru. Huwa baqa’ jingħata kura fit-Taqsima tal-Kura Intensiva fl-isptar Mater Dei fejn miet ilbieraħ.

Fiż-żewġ każijiet, il-pazjenti kienu jbatu minn mard kroniku ieħor.

Il-Ministeru għas-Saħħa, filwaqt li jagħti l-kondoljanzi lill-familjari, jappella biex il-poplu jibqa’ jsegwi l-appelli tad-Dipartiment tas-Saħħa, fosthom il-ħasil tal-idejn ta’ spiss, id-distanza fiżika u l-użu tal-maskra kullimkien.