F'intervista fuq Net Fm Adrian Delia, Kap Nazzjonalista, ammetta li s-sondaġġi juru lill-PN sejjer lura u saħaq li jekk il-partit se jibqa' jaħseb li huwa ta' settur wieħed tal-poplu mhux se jimxi 'l quddiem. Huwa qal illi kellu pjan ta' ħames snin u jrid ikompli jibni fuqu u qal illi l-elezzjoni interna se tfisser illi l-partit se jitlef maratona ta' ġbir ta' fondi.
"Il-kandidati lesti biex nuru lin-nies li għandna uċuħ ġodda imma hemm min qiegħed ifixkel u min qed ifixkel ma nistgħux inħalluh."
"Issa li l-qgħad qed jiżdied, issa n-nies qed ifittxu, issa l-mument ... allura issa l-mument li nfixklu lil xulxin? Fi tliet snin ksibna riżultati tajbin," saħaq Delia. Hu qal li jekk il-PN kien qed jirriskja li jitlef il-każini ma tilifhomx, il-PN daħħal nies ġodda - anke permezz tal-clusters u kandidati ġodda mal-istess PN.
"Imma kien hemm minn din kienet qed idejqu għax kien se jitlef il-poter. Il-poter huwa kemm se tkun lest isservi" qal Delia li saħaq illi x-xogħol ta' tliet snin m'għandux jitħalla jiġġarraf.
Adrian Delia nsista li l-għaqda ma tiġix meta tarmi l-għażla tat-tesserati ta' tliet snin ilu. "L-għaqda tfisser li naħdmu flimkien u allura nkunu leali lejn xulxin. Jiena ċert li t-tesserati jridu dak li għażlu tliet snin ilu."
"Partit rebbieħ qatt ma jista' jinbena fuq it-tradiment," sostna Delia.
