Minn kemm ilu li daħal fis-seħħ avviż legali ġdid li żied l-infurzar fuq min jikser ir-regolamenti imposti biex tkun imrażżna l-imxija tal-Covid-19, saru 250 spezzjoni f'diversi ħwienet u 34 persuna weħlu multa ta' €50 wara li nstabu bla maskra.
Qalet dan is-Supretendent tas-Saħħa Pubblika, Charmaine Gauci, meta kienet qed tkun intervistata fuq TVM.
Gauci qalet ukoll li ħames stabbilimenti ta' divertiment ingħataw multa ta' €3,000 wara li nstabu jiksru r-regolamenti l-ġodda dwar l-attivitajiet tal-massa.
Fi stabbililmenti simili saru 200 spezzjoni.
Il-ġimgħa li għaddiet il-Gvern daħħal restrizzjonijiet ġodda biex kwalunkwe attività tal-massa ma taqbiżx it-300 persuna jekk issir fuq barra u 100 persuna jew fuq ġewwa.
Ma jsiffirx li kull stabbiliment jista' jdaħħal il-massimu. F'kull stabbiliment, sew jekk fuq ġewwa u anke fuq barra, ma jistax ikun hemm aktar minn persuna waħda kull erba' metri kwadri.
Waqt l-istess intervista, Gauci ma eskluditx l-introduzzjoni ta' aktar miżuri restrittivi jekk il-każi jibqgħu jiżdiedu fil-ħmistax li ġejjin.