In-numri tal-każi tal-Covid-19 komplew jiżdiedu b'16-il immigrant li waslu Malta lbieraħ u fl-aħħar ġimgħat jirriżultaw fil-pożittiv u l-imxija lokali tiżdied b'20 persuna oħra. Dan ifisser illi fl-aħħar 24 siegħa kien hemm 36 każ ġdid għal total ta' 249 każ attiv, li prattikament irriżultaw f'ġimagħtejn - mill-firxa f'party fil-Lukanda Radisson, għall-festa ta' Santa Venera kif ukoll id-dħul f'Malta ta' diversi dgħajjes b'immigranti.
Għal xi raġuni n-numru ta' każi fost l-immigranti ma kienx inkluż ma' dawk il-ġodda, imma biss mal-każi attivi.
B'kollox fl-aħħar 24 siegħa kien hemm 1,839 swab u żewġ persuni li fiequ.
Mis-16-il immigrant tlieta huma minn dawk li waslu lbieraħ u l-bqija huma każi ta' persuni li ġew Malta fl-aħħar gimagħtejn.
Dan huwa l-ogħla numru ta' każi pożittivi minn xhur ilu meta l-pajjiż kien fl-eqqel tal-pandemija.