Claudio Grech huwa d-Deputat Nazzjonalista l-favorit mid-19-il Deputat bħala dak li jieħu post il-Kap tal-Oppożizzjoni preżenti Adrian Delia u dan wara vot fil-Grupp Parlamentari li mar kontra l-Kap kurrenti . 19-il Deputat inkluż żewġ MEPs sfiduċjaw lil Delia lbieraħ biż-żewġ Deputati tal-Oppożizzjoni fil-Parlament Marlene u Godfrey Farrugia jindikaw li anke huma lesti jappoġġjaw Kap tal-Oppożizzjoni ġdid.
Jidher iżda illi Grech jixtieq li kemm jista' jkun dan il-proċess ma jkissirx u jagħmel aktar ħsara ghall-partit, milli diġa' seħħet sa issa. Għalhekk qiegħed jipprova jilħaq xi forma ta' kompromess ma' Delia, biex l-istrateġija tat-tneħħija ta' Delia, tkun kemm jista' jkun inqas dannuża.
Fil-Parlament illejla waqt il-plemarja jidher li Delia u Grech kellhom konverżazzjoni ta' madwar 10 minuti, għalkemm mhux magħruf x'kien diskuss.
Intant fi stqarrija d-Deputati li ħaduha kontra Delia ma wrewx x'inhi t-triq 'il quddiem imma sempliċiment appellaw lil Delia biex ipoġġi lill-partit u lill-pajjiż l-ewwel u qabel kollox u jwissu li huma determinati li jkomplu jġibu ruħhom fl-aħajr interess tal-partit u l-pajjiż.