Lilhinn minn numri u statistika dwar il-coronavirus hemm ir-realtà ta' sitt familji, sa issa, fil-pajjiż illi għalihom dan il-virus fisser it-telfa ta' xi ħadd mill-aktar għeżież tagħhom. Iktar kmieni llum tħabbret is-sitt mewta kaġun tal-Coronavirus u mill-ewwel bdew jinkitbu ħafna messaġġi ta' kondoljanzi u qsim il-qalb, forsi l-aktar notevoli huwa l-messaġġ li ħalliet bintu, Hannah.
"Għażiż missier ma nistax nemmen li qed nikteb dan," tibda tgħid qabel imbagħad tgħid illi l-ebda kliem ma jistgħu qatt jesprimu kemm se tħoss in-nuqqas tiegħu. "Kburija ngħid illi għamilt dak kollu possibbli biex tħossok komdu, mifhum u maħbub..."
Bint it-tabib ta' 53 sena li miet illum mill-Covid-19 ttemm tgħid li l-unika konsolazzjoni hija li issa m'għadux f'battalja kontinwa għal ħajtu.
Il-Covid-19 huwa tip ta' virus li jolqot l-aktar lil dawk li huma akbar fl-età kif ukoll dawk li diġà għandhom numru ta' kumplikazzjonijiet. Sa issa t-tabib li ħalla ħajtu huwa l-iżgħar vittma tal-marda f'pajjiżna li fl-aħħar jiem kien qed jirreġistra numri iżgħar ta' każi, ħafna minnhom ikkonċentrati fi sptarijiet.
Din il-mewt, forsi ftit iktar mill-ħamsa ta' qabel ħasdet lill-pajjiż li huwa mifhum li beda jimxi fit-triq tal-fejqan tant li bħal ħafna pajjiżi oħrajn beda jirrilassa xi ftit mill-miżuri li l-Gvern kien ħa biex jirrestrinġi l-moviment tan-nies fil-pubbliku.