Mitlub jikkumenta dwar messaġġ iebes li ħalla Matthew Caruana Galizia u li fih qed jitfa' t-tort ta' dak li ġara lill-ommu f'ħoġor Muscat, il-Prim Ministru Joseph Muscat żamm il-bogħod illi jwieġeb direttament dwar il-kummenti partikolari. Hu qal iżda illi "kieku sibt lill-ommi mqatta' biċċiet kont nikteb agħar milli kiteb (Caruana Galizia)."
'Ma mortx nistaħba. Mort niffaċċja l-media internazzjonali u mort niddefendi isem pajjiżna u hekk se nibqa' nagħmel. Nispera li hawn Malta jkollna front magħqud. Għalhekk hemm bżonn ta' għaqda nazzjonali u jien se nkun fuq quddiem nett biex nilqa' għall-pajjiż u Malta tkompli miexja 'l quddiem." Muscat kien intervistat aktar kmieni illum fuq l-istazzjon tas-CNN.
Muscat li kien qed jitkellem waqt programm speċjali ta' Dissett Muscat qal li l-Gvern se jagħmel minn kollox biex dan il-każ ikun solvut. "Apparti l-familja, huwa fl-interess tiegħi li dan il-każ ikun solvut," sostna Muyscat li fakkar kif dan il-qtil tefa' l-attenzjoni kollha tal-pajjiż fuqu bħala Prim Ministru.
Muscat qal illi apparti nies mill-Olanda u mill-FBI, il-Gvern Malti rċieva diversi messaġġi minn pajjiżi oħrajn li qed juru illi lesti jgħinu lill-awtoritatajiet Maltin.
kieku sibt lill-ommi mqatta' biċċiet kont nikteb agħar milli kiteb (Matthew Caruana Galizia)
Il-PM Joseph Muscat
"Dan huwa mument diffiċli għalina wkoll u ma nistax inġerraħ kif xi ħadd ineħħi ħajja ta’ persuna." Mistoqsi jekk għandux jirreżenja kif talab Delia, Muscat sostna li "huwa fl-interess tiegħi u għandi kull interess li jitressqu għall-ġustizzja. In-nies eleġġewni bħala kap tal-pajjiż u jien irrid nara li l-pulizija jkollhom ir-riżorsi biex imexxu fuq dan il-każ," sostna Muscat.
Intant il-PM Muscat qal li l-Gvern, apparti l-ħidma tal-Pulizija, qed jikkunsidra xi forma ta' offerta monetarja mill-istat għal min jiġi 'l quddiem b'informazzjoni.
