Wara ġimgħat ta’ investigazzjonijiet il-Pulizija arrestat żagħżugħ ta’ 21 sena suspettat li kien il-moħħ wara diversi karozzi li ngħataw in-nar fil-Belt Valletta.
L-arrest seħħ mill-Arsons Unit fi ħdan l-Iskwadra tar-Reati Maġġuri, flimkien mal-Pulizija tad-Distrett tal-Beltwara sensiela ta’ attakki li seħħew bejn Lulju u Settembru.
Fost oħrajn, kienu ingħataw in-nar tliet vetturi, bil-konsegwenza li erba’ vetturi oħra li kienu pparkjati ħdejhom ġarrbu ħsarat.
L-investigazzjonijiet wasslu wkoll biex l-istess żagħżugħ ġie identifikat li f’April illi għadda, allegatament ħaraq bieb ta’ residenza privata, fil-Belt ukoll.
Ta’ min ifakkar li fl-istess perjodu kienet ingħatat in-nar il-karozza tas-Sindku Belti Alfred Zammit ftit jiem biss wara li kien tkellem fuq dawn l-inċidenti.
L-attakki fil-Belt Valletta bdew f’Lulju li għadda, hekk kif fis-27 ta’ dan ix-xahar ingħatat in-nar karozza fi Triq San Sebastjan. L-għada, ingħataw in-nar karozzi fi Triq il-Funtana (biswit il-Forti Sant’Iermu).
Fil-5 ta’ Awwissu, ir-residenti ta’ Triq San Nikola qamu maħsuda għax indunaw b’karozza li qed taqbad u ftit jiem wara, fid-9 ta’ Awwissu l-istess ġralhom ir-residenti fi Triq il-Lvant.
Dik tas-Sindku Alfred Zammit ngħatat in-nar fl-24 ta’ Settembru.
Intant, f’April, kien hemm żewġ karozzi oħra li nstabu ħuġġieġa waħda, fosthom karozza li kienet ipparkjata wara Dar il-Mediterran.
Aqra wkoll:
180 vettura jingħataw in-nar f’inqas minn tliet snin; 11-il każ biss solvut
