Minn Jannar tal-2018, sal-aħħar ta’ Awwissu tal-2020, kien hawn 180 vettura li ngħataw in-nar fit-toroq, x’aktarx fil-ħemda tal-lejl. Minn dawn, 11-il każ biss ġew solvuti u waslu biex persuni jitressqu l-Qorti.
Dan jirriżulta minn statistika li talbet il-gazzetta ILLUM lill-Korp tal-Pulizija u dan hekk kif fl-aħħar xhur, kien hemm sensiela ta’ każi ta’ karozzi li ngħataw in-nar fil-Belt Valletta, inkluż dik tas-Sindku Belti, Alfred Zammit, li ftit tal-jiem qabel kien għadu kemm tkellem dwar dan u insista li r-residenti Beltin huma mwerwra.
Fil-fatt, tul din is-sena, il-maġġoranza tal-każi ta’ karozzi li ngħataw in-nar seħħew fil-Kapitali. B’kollox kien hemm sitt karozzi li nstabu ħuġġieġa.
L-attakki fil-Belt Valletta bdew f’Lulju li għadda, hekk kif fis-27 ta’ dan ix-xahar ingħatat in-nar karozza fi Triq San Sebastjan. L-għada, ingħataw in-nar karozzi fi Triq il-Funtana (biswit il-Forti Sant’Iermu).
Fil-5 ta’ Awwissu, ir-residenti ta’ Triq San Nikola qamu maħsuda għax indunaw b’karozza li qed taqbad u ftit jiem wara, fid-9 ta’ Awwissu l-istess ġralhom ir-residenti fi Triq il-Lvant.
Dik tas-Sindku Alfred Zammit ngħatat in-nar fl-24 ta’ Settembru.
Intant, f’April, kien hemm żewġ karozzi oħra li nstabu ħuġġieġa waħda, fosthom karozza li kienet ipparkjata wara Dar il-Mediterran.
L-akbar ammont ta’ każi seħħew f’Bormla
Iżda jekk din is-sena, l-maġġoranza tal-każi seħħew fil-Belt Valletta, meta wieħed jara l-istatistika kollha li kisbet il-gazzetta ILLUM, li tkopri minn Jannar 2017 sal-aħħar ta’ Awwissu 2020, jirriżulta li l-maġġoranza ta’ każi ta’ vetturi li ngħataw in-nar, seħħew f’Bormla.
Fil-fatt minn Jannar tal-2018, f’Bormla kien hemm 15-il każ ta’ vetturi li ngħataw in-nar, bil-maġġoranza tal-każi, jiġifieri sitta seħħew fl-2018.
Il-Belt Valletta, flimkien ma’ Ħal Qormi, jiġu immedjatament wara Bormla hekk kif fil-perjodu msemmi, f’dawn iż-żewġ lokalitajiet kien hemm 13-il każ ta’ vetturi li ngħataw in-nar.
Fil-Marsa u l-Ħamrun kien hemm 12 u 11-il każ rispettivament, tmienja f’Birkirkara, f’San Pawl il-Baħar u f’Ħaż-Żabbar u sitta f’Wied il-Għajn u ż-Żejtun.
Fl-aħħar tliet snin, anke jekk id-differenza mhijiex xi waħda sostanzjali, jidher li għadd ta’ każi qed jonqos kull sena.
Fil-fatt, fl-2018, il-Pulizija kellha quddiemha 64 każ, 60 fl-2019 u 56 sa Awwissu ta’ din is-sena.