Aħbar tajba għall-ġurnalisti u l-attivisti ... tiġi approvata l-leġiżlazzjoni kontra każijiet ta' SLAPP

Ilbieraħ l-MEPs ivvutaw f’rapport tal-MEP Maltija Roberta Metsola (EPP) u l-MEP Ġermaniż Tiemo Wölken (S&D) li sejjaħ għal mekkaniżmu kontra każijiet ta' SLAPP. Ir-rapport ġie adottat fil-plenarja Ewropea b'444 vot favur, 48 kontra, u 75 astensjoni.

F’dan ir-rapport, il-Parlament Ewropew appella għal direttiva li tkopri każijiet SLAPP filwaqt li jipproponi t-tisħiħ tal-libertà tal-midja. Ir-rapport jenfasizza l-effett detrimentali li dawn SLAPPs għandhom fuq l-eżerċizzju tad-drittijiet u l-libertajiet fundamentali, kif ukoll inaqqsu l-ħsieb u l-opinjoni pubblika, il-kritika, u jdgħajfu d-demokrazija u l-istat tad-dritt.

Il-kawżi SLAPP, Kawża Strateġika Kontra l-Parteċipazzjoni Pubblika, m’humiex sempliċiment libell jew każ fil-Qorti. SLAPP hi kawża mfassla bħal bizzilla biex tiċċensura u tintimida lill-ġurnalisti u anke attivisti. Dan kollu jsir minn persuni li l-għan tagħhom hu li jsikktu lill-kritiċi tagħhom. 

Fir-rapport, is-SLAPPs huma deskritti bħala prattika kontinwa użata biex tbeżża' lill-ġurnalisti jew attivisti u jwaqqfu investigazzjonijiet dwar korruzzjoni u kwistjonijiet oħra ta' interess pubbliku. 

Aqra iktar fuq il-leġiżlazzjoni tal-iSLAPP:

• Leġiżlazzjoni SLAPP | 'Il-libertà għall-ġurnalisti li jagħmlu xogħlhom mhix separata mid-demokrazija'
• 'Ħsibt li l-libell hu l-prezz li ġurnalist irid iħallas biex jagħmel xogħlu' - Matthew Caruana Galizia
• 425 ilment ta' attakki u pressjoni fuq 1,180 ġurnalist jew Dar tal-Midja fl-UE fl-2020