Roberta Metsola tkeċċi MPE Pollakk wara kumment anti-Semitiku waqt mument ta’ silenzju għall-vittmi tal-Olokawst

Grzegorz Braun, Membru Parlamentari Ewropew li mhu affiljat mal-ebda grupp politiku Ewropej, ġie mkeċċi minn seduta parlamentari Ewropea wara kumment li tellef sessjoni ddedikata lill-vittmi tal-Olokawst nhar l-Erbgħa. 

Waqt il-minuta ta’ silenzju, li kienet organizzata waqt il-plenarja tal-Parlament Ewropej, Braun instema’ jgħid “ejja nitolbu għall-vittmi tal-ġenoċidju Lhudi f’Gaża,” u “grazzi lil kulħadd tat-talb tagħkom.”  

Wara li għaddiet il-minuta ta’ silenzju, il-President tal-Parlament Ewropew Roberta Metsola dlonk staqsietu biex jitlaq, u aktar tard staqsiet sabiex jiġi mkeċċi.  

Dan l-aġir ġab miegħu kummenti mħallta. Il-Kungress Ewropew Lhudi rrefera għal dawn il-kummenti bħala “anti-Semitiżmu fil-qalb tad-demokrazija Ewropea.” Filwaqt li Membri Parlamentari Ewropej Pollakki wkoll urew id-diżappunt tagħhom. “Tal-Mistħija,” stqarr l-MEP Dariusz Joński fuq il-pjattaforma soċjali X. 

Din ma kinitx l-ewwel xena kontroversjali li ħoloq Braun waqt il-karriera politika tiegħu. Fl-2023, huwa tefa xemgħat tal-Hanukkah b’fire extinguisher waqt ċeremonja ma’ awtoritajiet Pollakki Lhudin u Iżraeljani. Braun pinġa lilu nnifsu bħala individwu reliġjuż u konservativ fil-passat, bi stqarrijiet pubbliċi rigward il-poplu Lhudi, nies LGBTQ+ u l-pandemija tal-CoronaVirus.