Diversi NGOs ambjentali ewlenin f’Malta qed jikkundannaw dak li jsejħu bħala tneħħija irregolari tar-rappreżentant tagħhom fil-Bord tal-Ippjanar, wara li dan ikkritika b’mod qawwi l-approvazzjoni ta’ żvilupp illegali f’Montekristo.
Ir-rappreżentant inkwistjoni, Romano Cassar, kien wieħed mill-ftit li vvota kontra l-permess kontroversjali li nħareġ aktar kmieni dan ix-xahar għall-zoon u l-faċilitajiet ekwestri ta’ Charles Polidano – żvilupp massiċċ fuq art agrikola barra ż-żoni ta’ żvilupp f’Ħal Farruġ.
Il-permess ġie approvat b’maġġoranza ta’ disa’ membri kontra tnejn — fosthom Cassar u l-viċi chairman Martin Camilleri. Cassar kien iddeskriva s-sit bħala eżempju ta’ "impunità", u wissa li s-sanzjonar ta’ illegalitajiet bħal dawn jibgħat messaġġ perikoluż lis-soċjetà.
"Immaġina kieku kulħadd jibda jġib ruħu hekk... tkun ħaġa serja ħafna," kien qal waqt il-laqgħa tal-Bord.
Issa, f’dikjarazzjoni konġunta, l-NGOs ewlenin ambjentali qed jitolbu li l-ħatra ta’ Perit Jorge Spiteri bħala l-membru ġdid fil-Bord tal-Ippjanar tiġi revokata, u jsostnu li din saret mingħajr ma ġew ikkonsultati kif tipprovdi l-liġi.
"Ħadd mill-NGOs li ffirmaw din l-istqarrija — li jirrappreżentaw il-parti l-kbira tal-moviment ambjentali f’Malta — ma ġie kkuntattjat dwar din il-ħatra, u wisq inqas ġew mitluba jinnominaw lil Perit Spiteri," qal l-istqarrija.
Skont l-Att dwar l-Ippjanar għall-Iżvilupp, ir-rappreżentant tal-NGOs għandu jinħatar minn fost kandidati nominati mill-istess organizzazzjonijiet. L-NGOs issa qed jgħidu li l-Bord mhux kompost regolarment u li dan jista’ jkomprometti l-validità ta’ kwalunkwe deċiżjoni li jittieħdu mil-lum ‘il quddiem.
F’kumment qasir lil gazzetta oħt MaltaToday, Romano Cassar qal li kien lest jerġa’ jaċċetta t-tieni mandat jekk jintalab minn dawn l-istess NGOs, iżda ma daħalx fid-dettall dwar iċ-ċirkostanzi tat-tneħħija tiegħu.
L-organizzazzjonijiet esprimew ukoll l-apprezzament tagħhom lejn Perit Jorge Spiteri, li wara li ġie appuntat infurmah b’mod immedjat dwar is-sitwazzjoni u rrikonoxxa li kienet waħda anomala.
L-istqarrija kienet iffirmata mir-Ramblers Association of Malta, Flimkien Għal Ambjent Aħjar, BirdLife Malta, Din l-Art Ħelwa, Nature Trust Malta, Moviment Graffitti, u Għawdix.
.jpg)
