Il-ġuri ta' Yorgen Fenech ikompli b'aktar xhieda mistennija quddiem il-ġurati

Il-ġuri ta' Yorgen Fenech, akkużat li kien il-moħħ wara l-assassinju tal-ġurnalista Daphne Caruana Galizia, illum ikompli b'aktar xhieda mistennija jinstemgħu quddiem il-ġurati fl-Awla 22, hekk kif il-Prosekuzzjoni tkompli tippreżenta l-evidenza tagħha.

Is-seduta tal-bieraħ kienet iddominata minn evidenza elettronika, b'numru ta' uffiċjali tal-Pulizija u esperti forensiċi jixhdu dwar il-kontenut estratt minn mobiles, laptops u apparati oħra elevati matul l-investigazzjoni. Il-ġurati raw ukoll chats, emails, recordings u dokumenti li ġew esebiti mill-Prosekuzzjoni.

Fost l-aktar xhieda li spikkaw kien hemm dik tal-espert tal-Europol Ioannis Chatziantoniou, li qal li ma sab l-ebda indikazzjoni li żewġ dokumenti skennjati kienu ġew iffalsifikati, kif ukoll dik tas-Surġent Josef Gerada, li kompla jispjega l-analiżi tal-kontenut estratt mill-mobile ta' Melvin Theuma.

Matul is-seduta ġew esebiti wkoll messaġġi bejn Yorgen Fenech u l-eks Deputat Kummissarju tal-Pulizija Silvio Valletta, filwaqt li l-ġurati raw evidenza relatata ma' allegat xiri ta' armi mid-dark web u semgħu x-xhieda tal-eks kaptan tal-jottijiet tal-familja Fenech, Logan Wood, li rrakkonta ċ-ċirkostanzi tal-vjaġġ lejn Sqallija li spiċċa bl-arrest ta' Fenech f'Novembru tal-2019.

Il-proċeduri mistennija jkomplu matul il-jum b'aktar xhieda hekk kif il-ġurati jkomplu jisimgħu l-evidenza fil-ġuri li qed jinstema' quddiem l-Imħallef Edwina Grima.