Rohit Uniyal tressaq arrestat quddiem il-Qorti akkużat li intenzjonalment għamel ħsara lil karozza Audi u mutur Yamaha waqt inċident li allegatament seħħ f’Is-Swieqi għall-ħabta tas-6.00am tal-1 ta’ Awwissu. Huwa kien akkużat ukoll li nstab fis-sakra u mhux f’qagħda li jieħu ħsieb lilu nnifsu, kif ukoll li kiser il-paċi pubblika.
Il-Qorti semgħet li l-investigazzjoni tal-pulizija bdiet wara li wieħed mill-allegati vittmi għamel rapport fl-Għassa tal-Pulizija tas-Swieqi fejn sostna li l-mera tan-naħa tax-xellug tal-karozza tiegħu kienet ġarrbet ħsara estensiva. Bħala parti mill-investigazzjoni, il-pulizija eżaminaw filmati tas-CCTV miż-żona.
Il-prosekuzzjoni spjegat li l-uffiċjali kienu ġew infurmati li Uniyal kien instab fl-appartament tiegħu. Meta marru fir-residenza, l-imputat fetaħ il-bieb u ġie arrestat. Id-difiża ma kkontestatx il-validità tal-arrest, u Uniyal wieġeb mhux ħati għall-akkużi.
Meta talbet il-ħelsien mill-arrest, id-difiża argumentat li l-imputat ilu jgħix Malta għal diversi snin, għandu indirizz fiss, jaħdem bħala helper u cleaner, u qed jattendi wkoll korsijiet lokalment. Żiedet tgħid li għandu kondotta nadifa u li, jekk eventwalment jinstab ħati, il-fatt li jibqa’ jaħdem jippermettilu jikkumpensa lill-allegati vittmi għad-danni kkawżati.
Il-prosekuzzjoni oġġezzjonat għat-talba, billi argumentat li Uniyal m’għandux rabtiet b’saħħithom ma’ Malta u jgħix ma’ erba’ rġiel oħra li allegatament kienu preżenti waqt l-inċident iżda naqsu milli jwaqqfuh. Irrimarkat ukoll li, minkejja li kellu l-opportunità jagħmel dan, qatt ma rrapporta l-inċident lill-pulizija u ammetta li kien fis-sakra.
Wara li semgħet is-sottomissjonijiet taż-żewġ naħat, il-Qorti nnutat li xhieda ewlenin, fosthom l-allegati vittmi, għadhom iridu jixhdu u esprimiet tħassib li l-imputat seta’ jindaħal fl-evidenza jekk jinħeles. Għaldaqstant, il-Qorti ċaħdet it-talba għall-ħelsien mill-arrest u ordnat li Uniyal jibqa’ miżmum taħt arrest.
Il-prosekuzzjoni kienet immexxija mill-Ispetturi tal-Pulizija Gabria Gatt u Nigel Buhagiar. Uniyal kien irrappreżentat mill-avukat tal-għajnuna legali Martina Herrera.
Il-każ instema’ quddiem il-Maġistrat Nadia Vella.
.png)
