Matthew Vella tressaq arrestat quddiem il-Qorti akkużat li hedded lill-eks sieħba tiegħu, ikkaġunalha biża' u tħassib, għamel theddid permezz ta' komunikazzjoni elettronika u insultaha.
Il-Qorti semgħet kif l-inċident seħħ fl-1 ta' Awwissu f'Bormla. Skont il-prosekuzzjoni, it-tilwima qamet wara li Vella talab €700 lill-allegata vittma. Din irrifjutat tagħtihomlu, u spjegatlu li kellha bżonn il-flus għat-tfal tagħhom. L-argument imbagħad eskala u ssejħet il-pulizija.
Il-prosekuzzjoni qalet lill-Qorti li, fl-istqarrija tagħha lill-pulizija, il-mara ddeskriviet diversi okkażjonijiet fejn Vella allegatament heddidha u insultaha. Uħud minn dawn it-theddid allegatament saru wkoll permezz ta' komunikazzjoni elettronika.
Vella ammetta l-akkużi kollha miġjuba kontrih. Id-difiża ma kkontestatx il-validità tal-arrest tiegħu.
Filwaqt li qieset l-ammissjoni tal-ħtija u ċ-ċirkostanzi tal-każ, il-Qorti qiegħdet lil Vella taħt ordni ta' probation għal tliet snin flimkien ma' ordni ta' trattament għall-istess perjodu sabiex jindirizza l-vizzju tal-alkoħol u d-droga. L-istess uffiċjal tal-probation se jsegwi kemm l-ordni ta' probation kif ukoll dik ta' trattament u jippreżenta rapport dwar il-progress tiegħu lill-Qorti kull sitt xhur.
Il-Qorti ħarġet ukoll ordni ta' protezzjoni favur il-vittma, li tipprojbixxi lil Vella milli jikkuntattjaha jew jikkomunika magħha.
Il-prosekuzzjoni tmexxiet mill-Ispettur tal-Pulizija Carlos Cordina. L-akkużat kien assistit mill-avukati Amadeus Cachia u Ismael Psaila.
Il-każ instema' quddiem il-Maġistrat Nadia Vella.
.png)
