Il-Qorti tal-Appell ċaħdet l-appell imressaq minn Matthew Camilleri, ta’ 39 sena, u ħalliet fis-seħħ is-sentenza ta’ ħames snin priġunerija li kienet ġiet imposta fuqu b’rabta ma’ sensiela ta’ serqiet minn ħwienet tal-merċa u dulċier
Camilleri kien instab ħati li, fuq medda ta’ jumejn f’Novembru tal-2020, flimkien ma’ mara oħra, wettaq tliet serqiet minn The Convenience Shop f’Santa Venera u Ħal Balzan, kif ukoll minn Ta’ Xmun Confectionery f’Birkirkara.
Fl-appell tiegħu, l-imputat ikkontesta l-provi mressqa kontrih, b’mod partikolari x-xhieda tal-kompliċi. Huwa sostna li din ix-xhud ma kinitx affidabbli u allega li kienet tat informazzjoni falza dwar tarbija li qalet kienet tiegħu. Camilleri argumenta wkoll li, peress li l-mara ma kinitx akkużata flimkien miegħu, ix-xhieda tagħha ma kellhiex tintuża kontra tiegħu. Barra minn hekk, qal li l-konklużjoni tal-ewwel qorti dwar il-filmati tal-kameras tas-sigurtà kienet żbaljata.
Madankollu, il-Qorti tal-Appell, preseduta mill-Imħallef Neville Camilleri, qieset li l-proċeduri kriminali fil-konfront tal-mara kienu ġew konklużi għal kollox u li, għalhekk, ix-xhieda tagħha kienet ammissibbli skont il-liġi. Fir-rigward tal-filmati tas-sigurtà, il-qorti osservat li l-ewwel qorti ma kinitx qed tgħid li wiċċ l-imputat kien jidher b’mod ċar, iżda li l-persuna fil-filmati kienet taqbel mad-deskrizzjoni mogħtija mix-xhud.
Dwar il-piena, il-Qorti tal-Appell qalet li s-sentenza ta’ ħames snin priġunerija kienet taqa’ fi ħdan il-parametri legali u kienet ġustifikata fiċ-ċirkostanzi. Il-qorti rrimarkat ukoll li Camilleri ma kienx irnexxielu jtemm b’suċċess il-proċess quddiem il-Bord ta’ Riabilitazzjoni ta’ Persuni li Nqabdu bid-Droga u li kien ilu jinvolvi ruħu f’diversi każijiet kriminali.
Fl-osservazzjonijiet tagħha, il-qorti enfasizzat li jekk l-appellant tassew irid ibiddel ħajtu, għandu jagħmel sforz konkret biex jindirizza l-imġiba tiegħu. Ġie nnutat li kien ingħata opportunità sinifikanti meta l-qorti kienet assumiet il-funzjoni ta’ Qorti dwar id-Droga, opportunità li kieku wasslet għal piena ferm aktar favorevoli kieku l-proċess ta’ riabilitazzjoni kien ġie konkluż b’suċċess.
L-appell għalhekk ġie miċħud u s-sentenza oriġinali ġiet ikkonfermata
