Il-Pulizija tikkonfiska karozza ta’ żagħżugħ ta’ 21 sena mgħammra b’sirena ta’ emerġenza

Il-Pulizija kkonfiskat karozza li kienet mgħammra b’sirena ta’ emerġenza illegali, hekk kif il-vettura kienet tappartjeni lil żagħżugħ ta’ 21 sena.

Fi stqarrija, il-Pulizija spjegat li waqt rondi fir-Rabat innutaw karozza qed tinstaq b’veloċità ta’ 160km/siegħa.

Il-vettura eventwalment twaqqfet f’Siġġiewi, fejn il-Pulizija identifikat lis-sewwieq ta’ 21 sena. Minbarra numru ta’ irregolaritajiet oħra, il-Pulizija sabet ukoll sirena ta’ emerġenza illegali. Is-sewwieq ġie infurmat li se jinħarġu akkużi kontrih, filwaqt li l-vettura ġiet ikkonfiskata.

Aktar kmieni fil-lejl tat-Tlieta, il-Pulizija sabet ukoll sewwieq ta’ 25 sena u ieħor ta’ 26 sena jagħmlu drifting f’parkeġġ pubbliku f’Ta’ Qali.

Is-sewwieqa twaqqfu u l-Pulizija infurmathom li se jinħarġu akkużi kontrihom.

Il-Pulizija fakkret lill-pubbliku li s-sewqan b’veloċità eċċessiva mhux biss huwa illegali, iżda jpoġġi l-ħajjiet tan-nies f’riskju. Se jkomplu jsiru aktar spezzjonijiet u rondi.