L-awtoritajiet ħarġu 513-il multa u 123 akkuża matul ix-xahar ta’ Diċembru bħala parti minn operazzjoni kontra l-illegalitajiet fit-toroq.
Fi stqarrija, il-pulizija qalet li l-ispezzjonijiet fit-toroq saru b’mod regolari u f’ħinijiet differenti tal-ġurnata.
B’kollox saru 271 spezzjoni fit-toroq, li matulhom twaqqfu 7,932 vettura. Il-pulizija qalet ukoll li erba’ persuni nstabu jsuqu taħt l-influwenza tal-alkoħol.
Il-pulizija tat dettalji dwar żewġ spezzjonijiet partikolari li wasslu għall-arrest ta’ żewġ persuni.
L-ewwel arrest sar wara li l-pulizija nnutat vettura li ma waqfitx meta ngħatat ordni biex tagħmel dan, u li kienet qed tinstaq b’mod perikoluż. Wara xi ħin, is-sewwieq ħalla l-vettura mal-ġenb tat-triq u ġie arrestat aktar tard.
Is-sewwieq ammetta għall-akkużi miġjuba kontrih u se jingħata s-sentenza dalwaqt.
F’każ ieħor, sewwieq inqabad isuq vettura illegalment darbtejn fl-istess jum. Huwa qed jiċħad l-akkużi u ngħata l-ħelsien mill-arrest bil-kundizzjonijiet.
Sadanittant, il-pulizija spjegat li xi sewwieqa nqabdu jsuqu mingħajr liċenzja jew assigurazzjoni, oħrajn kienu qed iġorru aktar passiġġieri minn kemm tippermetti l-vettura, filwaqt li oħrajn instabu jsuqu mingħajr ċinturin tas-sigurtà.
Xi vetturi wkoll ġew irmunkati minħabba li l-liċenzja tal-vettura ma kinitx valida.
Il-pulizija qalet li l-infurzar se jkompli tul Lejliet l-Ewwel tas-Sena u l-Ewwel tas-Sena.
Żiedet ukoll li barra x-xahar ta’ Diċembru, saru 2,711 spezzjoni fit-toroq fejn twaqqfu 58,850 vettura. Dawn irriżultaw f’aktar minn 3,300 akkuża. Fl-2025, 43 persuna nqabdu jsuqu taħt l-influwenza tal-alkoħol.
.png)
