Silvestre Antonio Garcia Alvarez, ingħata piena effettiva ta’ 11-il sena ħabs u multa ta’ €18,000 wara li ammetta li kien involut f’importazzjoni u traffikar ta’ kokaina u sustanzi psikoattivi oħra.
Alvarez kien arrestat fil-5 ta’ Lulju tas-sena li għaddiet u mixli wkoll b'ħasil ta’ flus u pussess mhux għall-użu esklussiv tiegħu. Matul rejd tal-pulizija nstabu madwar 3kg kokaina, 600g amfetamini, 400g ketamina, 2,500 pillola ecstasy u ammont konsiderevoli ta’ flus kontanti.
L-akkużat tressaq flimkien ma’ Maximo Luna Diaz, ċittadin Spanjol ta’ 58 sena, iżda il-każijiet instemgħu separatament. Fil-27 ta’ Ottubru, Alvarez ammetta l-akkużi bħala parti minn ftehim mal-Avukat Ġenerali. Il-Qorti, ippreseduta mill-Imħallef Neville Camilleri, ikkunsidrat il-kondotta nadifa tiegħu u li ammetta, li evità proċeduri twal bla bżonn.
Il-piena proposta mill-prosekuzzjoni u d-difiża ġiet aċċettata mill-Qorti, li kkonkludiet li kienet proporzjonata u skont il-liġi.
Alvarez ġie kkundannat għal 11-il sena ħabs, multa ta’ €18,000 u ordnat iħallas €4,046.06 fi spejjeż tal-Qorti fi żmien sentejn, li fi ksur minnhom tinbidel f’sentenza addizzjonali. Il-Qorti ordnat ukoll li d-droga tinħaraq.
.png)
