Il-Qorti tal-Appell ikkanċellat il-kundanna għal disprezz tal-qorti kontra l-avukat Jason Azzopardi, wara li kkonkludiet li kien hemm żball proċedurali fil-mod kif kienet inqatgħet il-kawża fl-ewwel istanza.
Il-każ kien inqala’ wara li Yorgen Fenech – li jinsab akkużat li kien il-moħħ wara l-qtil tal-ġurnalista Daphne Caruana Galizia – allega li Azzopardi kiser żewġ deċiżjonijiet tal-qorti b’kitba fuq Facebook fil-21 ta’ Ġunju 2025.
Skont Fenech, il-post ta’ Azzopardi kien jirreferi b’mod ċar għalih u jimplika l-ħtija tiegħu fil-każ tal- qtil.
Fenech semma wkoll post ieħor ta’ Azzopardi tal-5 ta’ Ġunju 2025, li kien ippubblika wara l-verdett tal-ġurija fil-konfront ta’ Adrian Agius, Robert Agius, Jamie Vella u George Degiorgio.
Min-naħa tiegħu, Azzopardi sostna li l-kitba tiegħu kienet sempliċement tirrakkonta l-fatti tal-każ, u li Fenech ma kellux dritt jidħol f’materji li ma kienx parti minnhom.
Kundanna fl-ewwel istanza u appell
Il-Qorti Kriminali kienet qalet li l-imġiba ta’ Azzopardi kienet tikkostitwixxi disprezz tal-qorti, u għalhekk imponiet multa ta’ €300.
Azzopardi appella d-deċiżjoni fuq żewġ punti ewlenin. Huwa argumenta li l-imġiba tiegħu ma kinitx tikkostitwixxi disprezz in facie curiae — jiġifieri, diżordni waqt is-seduta tal-qorti — u li l-ewwel qorti żbaljat meta tat is-sentenza direttament mingħajr ma ħalliet lir-Reġistratur jibda l-proċeduri skont il-liġi.
Il-Qorti tal-Appell madankollu ċaħdet dan l-argument, u spjegat li l-ewwel qorti ma aġixxietx taħt il-proċedura ta’ in facie curiae, iżda taħt il-liġi li tirregola l-ksur ta’ projbizzjoni fuq pubblikazzjonijiet imposta minn qorti kriminali.
Skont l-Artikolu 517 tal-Kodiċi Kriminali, il-Qorti Kriminali li toħroġ ordni ta’ projbizzjoni għandha l-ġurisdizzjoni li tiddeċiedi jekk din ġiet miksura jew le, mingħajr ma jirreferu l-każ lir-Reġistratur. Għaldaqstant, l-ewwel punt tal-appell ġie miċħud.
Żball proċedurali u sentenza revokata
It-tieni punt tal-appell kien jikkontesta l-fatt li Azzopardi ma kienx ġie msejjaħ formalment quddiem il-qorti permezz ta’ ċitazzjoni jew arrest, iżda kien ikkundannat biss fuq applikazzjonijiet u dokumenti miktuba.
Il-Qorti tal-Appell qablet ma’ dan l-argument, u kkonkludiet li meta jkun hemm allegazzjoni ta’ ksur ta’ ordni ta’ pubblikazzjoni, il-qorti għandha ssejjaħ lill-akkużat quddiemha permezz ta’ proċess formali qabel ma tiddeċiedi l-każ. Peress li dan ma sarx, id-deċiżjoni tal-ewwel qorti kienet nulla, u l-multa ta’ €300 ġiet revokata.
Il-perjodu tal-appell ma kienx skada
Ir-Reġistratur tal-Qrati Kriminali argumenta wkoll li l-appell kien barra ż-żmien, billi kellu jitressaq fi żmien jumejn mid-deċiżjoni. Iżda l-Qorti tal-Appell ċaħdet ukoll dan l-argument, u qalet li peress li d-deċiżjoni kienet ingħatat in camera u mhux fil-qorti miftuħa, il-perjodu tal-appell jibda biss mill-mument tan-notifika lill-partijiet.
Is-sentenza ġiet mogħtija mill-Prim Imħallef Mark Chetcuti, flimkien mal-Imħallfin Robert Mangion u Grazio Mercieca.
Azzopardi kien assistit mill-avukati Arthur Azzopardi u David Chetcuti Dimech, filwaqt li r-Reġistratur tal-Qrati Kriminali u Tribunali kien rappreżentat mill-avukat Alfred Abela.
.png)
