Il-Qorti tal-Maġistrati, preseduta mill-Maġistrat Donatella Frendo Dimech, ikkundannat u mmultat €2,500 lil operatur ta’ stall fuq il-bajja tal-Għadira, wara li sabitu ħati li impjega lil ibnu ta’ 14-il sena bi ksur tal-liġijiet tal-impjieg.
Il-każ seħħ f’Awwissu tal-2024, meta uffiċjali ta’ Jobsplus għamlu spezzjoni f’kiosk tal-water sports f’Għadira Bay u raw lit-tifel fil-baħar jirranġa dgħajjes żgħar ) u jikrihom.
Skont ix-xhieda tal-ispetturi, huma osservaw lill-minuri għal madwar għaxar minuti qabel ma intervjenew. Meta ġew biex jistaqsuh, it-tifel kien ammetta li kien qed jaħdem. Meta nħarġet talba għall-VAT number tal-kumpanija, it-tifel ma setax jagħtiha u ċempel lil missieru, li wasal ftit wara u sostna li “ibnu kien biss qed jgħinu”.
Uffiċjali mid-Dipartiment tal-Edukazzjoni u mid-Dipartiment tar-Relazzjonijiet Industrijali u tal-Impjieg ikkonfermaw li ma kien hemm ebda awtorizzazzjoni biex it-tifel jaħdem, hekk kif il-liġi Maltija tipprojbixxi xogħol taħt l-età ta’ 15-il sena.
Il-Qorti tikkundanna lill-missier u tiddeskrivi t-testimonjanzi bħala “mimlija kontradizzjonijiet”
Matul il-proċeduri, id-difiża argumentat li t-tifel kien qed jara l-istall biss għal ftit minuti waqt li missieru kien telaq għal xi ħaġa żgħira. Imma l-Qorti ma emmnitx din il-verżjoni, u qalet li kemm it-tifel kif ukoll il-missier qalu ħafna żbalji u kontradizzjonijiet, speċjalment meta ġie ppruvat li l-ispetturi kienu diġà ilhom jarawh għal aktar minn għaxar minuti.
Il-Maġistrat Frendo Dimech kienet partikolarment kritika dwar l-att ta’ qerq lejn il-Qorti, tgħid li “it-tifel inqabed f’gidba kbira” u li kien “verament tal-mistħija li tifel ġie mġiegħel jigdeb taħt ġurament biex jgħin lil missieru jaħrab multa.”
Il-Qorti ċaħdet ukoll bħala “redikola” il-pretensjoni tal-akkużat li l-bajja ta’ Mellieħa tibqa’ vojta sal-12:00 tiddeskrivih bħala “insult għall-intelliġenza tal-Qorti”. Ritratti ppreżentati bħala prova wrew li l-bajja kienet diġà mimlija nies fis-11 ta’ filgħodu.
Il-verdett u r-rakkomandazzjonijiet
Il-Qorti sabet lill-akkużat ħati lil hinn minn kull dubju raġonevoli li impjega minuri fl-età skolastika obbligatorja, bi ksur ta’ Artikolu 42 tal-Att dwar is-Servizzi tal-Impjieg u t-Taħriġ (Kap. 594 tal-Liġijiet ta’ Malta), u għalhekk imponiet multa ta’ €2,500.
Saret rakkomandazzjoni qawwija biex l-ispetturi ta’ Jobsplus jiġu mgħammra b’body cameras, sabiex l-ispezzjonijiet ikunu dokumentati b’mod aktar preċiż u trasparenti.
Barra minn hekk, il-Qorti ordnat li kopja tas-sentenza tintbagħat lill-Kummissarju tal-Pulizija sabiex jevalwa jekk hemmx lok li jitressqu akkużi ta’ ġurament falz (perjury) kontra l-missier u t-tifel. Kopji se jintbagħtu wkoll lill-Ministru għall-Intern, is-Sigurtà u x-Xogħol, lis-Segretarju Parlamentari għad-Dialogu Soċjali, u liċ-ĊEO ta’ Jobsplus għal reviżjoni ta’ politika.
