Raġel ta’ 38 sena miż-Żurrieq, Glen Bundy, tressaq il-Qorti fejn ammetta li hedded, insulta u uża vjolenza kontra erba’ uffiċjali tal-Pulizija waqt inċident li seħħew f’Ġunju.
Bundy kien akkużat b’diversi reati, fosthom li attakka u rreżista uffiċjali pubbliċi, li ma obdiex ordnijiet tal-Pulizija, li kkaġuna tfixkil fil-pubbliku u li hedded uffiċjali – kemm wiċċ imb wiċċ kif ukoll b’messaġġi elettroniċi – fosthom surġent u żewġ kuntistabbli.
L-inċident seħħ bejn nofsillejl u l-4 ta’ filgħodu tas-7 ta’ Ġunju 2024 fiż-Żurrieq, meta Bundy allegatament sar aggressiv lejn l-uffiċjali, juża kliem offensiv u theddid, u aktar tard bagħtilhom messaġġi ta’ theddid permezz ta’ komunikazzjoni elettronika.
Il-Qorti kienet infurmata li l-akkuża relatata mar-reċidiva ġiet irtirata mill-prosekuzzjoni, filwaqt li Bundy wieġeb ħati għall-akkużi l-oħra kollha.
Fil-kunsiderazzjonijiet tagħha, il-Maġistrat Astrid May Grima nnutat li Bundy ammetta kmieni u wera koperazzjoni mal-awtoritajiet. Wara li ħadet inkunsiderazzjoni ċ-ċirkostanzi personali tiegħu u l-gravità tar-reati, il-Qorti kkundannatu għal 18-il xahar ħabs sospiżi għal tliet snin, flimkien ma’ multa ta’ €4,000 li għandha titħallas fi żmien tliet snin.
Il-Qorti ordnat ukoll ordni ta’ trattament ta’ tliet snin, sabiex Bundy jirċievi għajnuna psikjatrika, psikoloġika u terapewtika kif jirrakkomandaw l-uffiċjali tal-probation u professjonisti mediċi.
Barra minn hekk, il-qorti laqgħet it-talba tal-prosekuzzjoni għal ordni ta’ protezzjoni favur il-vittmi, u rabtet lil Bundy b’garanzija personali ta’ €2,000 għal sena, u ġie projbit milli javviċina, jagħti fastidju jew jinsulenta lill-uffiċjali.
Il-każ instema quddiem il-Maġistrat Astrid May Grima, filwaqt li l-ispetturi James Mallia u Wayne Bonello mexxew il-prosekuzzjoni.
