Il-Qorti Kostituzzjonali laqgħet l-appell ta’ Sebastian Dalli, u kkonfermat li nkiser id-dritt tiegħu għal smigħ xieraq fi żmien raġonevoli fil-każ ta’ traffikar ta’ droga li ilu pendenti għal snin twal kontrih.
Il-Qorti ordnat ukoll lill-prosekuzzjoni biex tiddikjara l-każ magħluq fi żmien xahrejn, billi nnotat li d-dewmien eċċessiv fil-proċeduri kien riżultat ta’ nuqqas ta’ azzjoni mill-awtoritajiet.
Dalli huwa ħu l-eks ministru u eks Kummissarju Ewropew John Dalli.
Każ li ilu miftuħ mill-2009
Fi Frar tal-2009, Sebastian Dalli kien ġie mixli li kkonfoffa biex jittraffika 30 kilo ta’ sustanza li kienet suspettata bħala kannabis, li kienet ġiet interċettata fuq jott li wasal minn Libja. Aktar tard, irriżulta li s-sustanza ma kinitx droga, iżda sapun.
Minkejja dan, 12-il sena wara, il-proċeduri kienu għadhom fl-istadju tal-evidenza tal-prosekuzzjoni, u l-Avukat Ġenerali ma kienx għadu ppreżenta l-att tal-akkuża.
Fit-30 ta’ Ottubru 2018, il-Pulizija ddikjaraw li ma kellhomx aktar evidenza x’jippreżentaw. Madankollu, bejn Ottubru 2018 u Marzu 2020, baqgħu jsiru diversi seduti biss biex jikkonfermaw jekk il-prosekuzzjoni kellhiex aktar x’toħroġ. F’Marzu 2020, l-Avukat Ġenerali ppreżenta lista ġdida ta’ xhieda, fosthom ko-akkkużati u persuni allegatament involuti. Ftit wara, il-proċess ġie sospiż minħabba l-pandemija tal-Covid-19.
Deċiżjoni tal-Qorti Ċivili u l-appell ta’ Dalli
F'Lulju 2022, il-Prim’Awla tal-Qorti Ċivili kienet diġà sabet li nkiser id-dritt fundamentali ta’ Dalli għal smigħ fi żmien raġonevoli, kif garantit mill-Artikolu 39(1) tal-Kostituzzjoni u l-Artikolu 6(1) tal-Konvenzjoni Ewropea tad-Drittijiet tal-Bniedem.
Minkejja li d-deċiżjoni kienet favurih, Dalli appella għax sostna li l-Qorti ma tatx rimedju effettiv. Huwa sostna li l-Qorti kellha tordna li tingħalaq il-fażi tal-evidenza tal-prosekuzzjoni u li l-Avukat Ġenerali jkun obbligat jippreżenta l-att tal-akkuża.
Il-Qorti Kostituzzjonali, preseduta mill-Prim Imħallef Mark Chetcuti flimkien mal-Imħallfin Giannino Caruana Demajo u Anthony Ellul, qalet li l-proċeduri kontra Dalli ilhom pendenti sa minn Frar 2009 mingħajr progress lejn ġuri, u li ebda parti mid-dewmien ma tista’ tiġi attribwita lill-akkużat.
Il-Qorti nnotat li d-dewmien kien ikkawżat minn nuqqas ta’ komunikazzjoni u ineffiċjenza bejn l-Uffiċċju tal-Avukat Ġenerali u l-Uffiċċjal Prosekutur.
Il-Qorti żiedet tgħid li sempliċi dikjarazzjoni ta’ ksur tad-drittijiet, mingħajr rimedju prattiku, tkun insuffiċjenti u kuntrarja għall-prinċipji tal-ġustizzja u l-ekonomija ġudizzjarja.
Għalhekk, il-Qorti Kostituzzjonali ikkonfermat li d-drittijiet fundamentali ta’ Dalli nkisru, ordnat li l-prosekuzzjoni tagħlaq il-każ fi żmien xahrejn, u ddeċidiet li l-ispejjeż tal-kawża jkunu mħallsa mill-Avukat Ġenerali.
Is-supretendent Johann J. Fenech ipprosekuta f’isem il-Pulizija, filwaqt li Dalli kien assistit mill-avukati Jacob Magri u Arthur Azzopardi.
