Ċittadin Ċiniż ta’ 63 sena, De Quan Feng, li kien jgħix San Pawl il-Baħar, ġie kkundannat sitt snin ħabs wara li l-qorti sabitu ħati li traffika tliet nisa Ċiniżi u sfruttahom fil-prostituzzjoni taħt il-kopertura ta’ massaġġi erotici.
Feng kien akkużat b’diversi reati, fosthom traffikar ta’ bnedmin, li jmexxi postijiet immirati għall-prostituzzjoni, u li juża proprjetajiet għal dan l-iskop. Madankollu, huwa ġie meħlus mill-akkuża li kien jgħix mill-qligħ tal-prostituzzjoni, peress li l-vittmi stess xehdu li kienu jitħallew iżommu l-flus li jaqilgħu mill-massaġġi.
Il-każ imur lura għal Lulju tal-2014, meta l-Pulizija wettqu rejd fuq diversi saloons tal-massaġġi f’Santa Venera u f’Raħal Ġdid wara rapporti li wieħed minnhom, Golden Fingers, kien qed jintuża bħala bordell. L-investigazzjonijiet żvelaw li Feng kien is-sid ta’ dan l-istabbiliment, kif ukoll ta’ żewġ postijiet oħra f’Raħal Ġdid u r-Rabat.
Matul ir-rejds, il-pulizija sabu tliet nisa Ċiniżi li qalu li ġew miġjuba Malta minn Feng u li kienu ordnati jagħtu massaġġi erotici. Xi klijenti li tkellmu mal-investigaturi kkonfermaw li kienu rċevew servizzi sesswali.
Fil-qorti, in-nisa rrakkontaw kif Feng heddidhom, u qalilhom li jekk ma jaqblux jagħtu massaġġi erotici, kien se jżommhom lura milli jsibu xogħol ieħor jew iwaqqaf il-proċess tal-permessi tax-xogħol tagħhom.
Il-Maġistrat Kevan Azzopardi, li ppreżieda l-każ, iddeskriva t-traffikar tal-bnedmin bħala “reat serju ħafna”, u saħaq li ma jistax ikun aċċettat li xi ħadd jibbenefika mill-isfruttament ta’ ħaddieħor.
“It-tliet nisa ġew Malta jfittxu ħajja aħjar,” qal il-maġistrat, “imma t-tama tagħhom sfaxxat — spiċċaw skjavi, jaħdmu sigħat twal u kontra r-rieda tagħhom.”
Feng kien ikkundannat sitt snin ħabs u ġie ordnat iħallas €7,767 f’ħlasijiet lill-esperti. Il-qorti ordnat ukoll li jiġu revokati l-liċenzji tat-tliet saloons tal-massaġġi tiegħu u ħarġet ordni ta’ protezzjoni ta’ tliet snin għall-vittmi.
Il-każ kien immexxi mill-Ispetturi Sylvana Gafa u Joseph Busuttil.
