L-eks Kap tal-Persunal tal-Uffiċċju tal-Prim Ministru, Keith Schembri, ippreżenta kwerela kriminali quddiem il-Kummissarju tal-Pulizija, fejn qed jitlob investigazzjoni sħiħa dwar l-azzjonijiet ta’ diversi esperti maħtura mill-Qorti li kienu involuti fl-inkjesta dwar il-każ Vitals u f’każijiet kriminali oħra.
Fil-kwerela tiegħu, Schembri jsostni li għalkemm dawn l-esperti ġew maħtura personalment mill-Qrati Maltin, il-ħlasijiet għal xogħolhom saru mhux direttament lilhom, iżda permezz ta’ kumpanija fir-Renju Unit bl-isem Harbinson Forensics Ltd.
Skont il-kwerela, din il-kumpanija kienet toħroġ il-fatturi lill-Qorti Maltija għall-ħidma mwettqa mill-esperti, iżda mill-aktar minn €20 miljun imħallsa għal dawn is-servizzi, allegatament l-esperti rċevew biss porzjon żgħir tal-flus, filwaqt li l-bqija nżammu mill-kumpanija. Dan qajjem suspett ta’ kummissjonijiet moħbija u ħlasijiet żejda.
Il-kwerela tgħid ukoll li xi esperti waqqfu kumpaniji fir-Renju Unit biex jirċievu l-ħlasijiet għal raġunijiet fiskali, iżda xi wħud minn dawn il-kumpaniji issa jinsabu fi proċess ta’ likwidazzjoni jew magħluqa, fatt li jista’ jwassal biex jintilef jew jinqered xi evidenza.
Schembri jiddikjara wkoll li fil-fajls tal-Qorti hemm inkonsistenzi f’affidavits, rifjut li jixhdu, u fatturi duplikati jew rikostruwiti, li jistgħu jindikaw imġiba potenzjalment frodulenta.
Fil-kwerela tiegħu, Schembri jargumenta li l-istess esperti li qed jakkużaw oħrajn bil- ħela ta’ flus pubbliċi, jistgħu jkunu huma stess ikkawżaw telf ta’ miljuni ta’ ewro lill-Istat Malti. Għalhekk, qed jitlob investigazzjoni kriminali dwar frodi, serq b’dilusjoni, falsifikazzjoni ta’ dokumenti, dikjarazzjonijiet foloz lil awtoritajiet pubbliċi, korruzzjoni, sperġur, ħasil ta’ flus u reati oħra relatati mat-taxxa.
Il-kwerela tissottolinja li dawn l-allegazzjonijiet għandhom jiġu investigati b’urġenza sabiex tinżamm l-integrità tas-sistema ġudizzjarja u biex ma jintilfux provi bħar-rekords bankarji, emails u data kontabbli.
Schembri jgħid li t-tim legali tiegħu għandu dokumenti li jappoġġjaw dawn l-allegazzjonijiet, u flimkien mal-kwerela kriminali, huwa ressaq ukoll protest ġudizzjarju kontra l-Aġenzija tas-Servizzi tal-Qrati, fejn talab li ssir investigazzjoni interna u li jittieħdu passi meħtieġa.
Il-kwerela ġiet ippreżentata permezz tal-avukati tiegħu Mark Vassallo, Edward Gatt u Shaun Zammit.
Skont l-inkjesta tal-Vitals, Keith Schembri huwa meqjus bħala wieħed mill-figuri ewlenin fil-ftehim frodulenti li wassal biex miljuni ta’ ewro ta’ fondi pubbliċi ntefqu b’mod ħażin permezz tal-konċessjoni tal-isptarijiet pubbliċi.
