L-eks gowlkiper tat-tim nazzjonali u eks kunsillier tal-Partit Laburista, Justin Haber, instab ħati li wettaq atti jew imġiba ta’ natura sesswali lejn minorenni taħt il-ħmistax-il sena.
L-akkużi kienu jinkludu espressjonijiet verbali, ġesti jew atti fiżiċi li ma kinux mixtieqa mill-vittma u li setgħu raġonevolment jitqiesu bħala offensivi, umiljanti, degradanti jew intimidanti lejha.
Haber wieġeb mhux ħati għall-akkużi miġjuba kontrih.
Ir-reati seħħew bejn l-2020 u l-2022. Matul dan il-perjodu, il-vittma ta’ 14-il sena kienet impjegata bħala waitress fil-lokal Pitch 16 f’Marsaxlokk, fejn Haber kien is-sid tagħha.
L-Ispettur Kylie Borg, mill-Vice Squad, xehedet li fit-29 ta’ Awwissu 2022 irċeviet komunikazzjoni mingħand Aġenzija Appoġġ dwar rapport anonimu li kien jgħid li tfajla żagħżugħa kienet se tinvolvi ruħha f’laqgħat sesswali ma’ Haber.
L-ispettur intweriet chat anonimu allegatament bejn Haber u persuna mhux identifikata. Wara l-investigazzjoni tagħha, l-Ispettur Borg identifikat il-persuna involuta u intervistatha fil-preżenza tal-ġenituri tagħha.
Il-vittma qalet li Haber laqatha fuq is-sider tagħha, talabha biex tbusu fuq ħaddejh u mbagħad dawwar rasu b’tali mod li spiċċat biesitu fuq xufftejh.
Hija sostniet ukoll li Haber talabha ritratti f’nude tas-sider tagħha (li qatt ma bagħtetlu) u staqsiha darbtejn dwar il-verġinità tagħha, kif ukoll stedinha darbtejn biex ikollha relazzjoni sesswali miegħu.
Wara dan, l-akkużat ġie arrestat fis-6 ta’ Ottubru 2022 ħdejn il-ground tal-futbol ta’ Kordin.
Matul l-interrogazzjoni tiegħu, li saret fil-preżenza tal-avukat tiegħu, Haber ċaħad li bagħat il-messaġġi, u sostna li kienu miktubin tajjeb wisq għalih billi hu dislessiku. Madankollu ammetta li l-bewsa seħħet kif irrakkuntat. Huwa ċaħad li stedinha fid-dar tiegħu, iżda kkonferma li laqatha fuq is-sider u staqsiha dwar il-verġinità tagħha.
Il-vittma, li xehedet permezz ta’ video conferencing, qalet li l-imġiba ta’ Haber kienet normali fil-pubbliku, iżda mhux xierqa wara l-kwinti. Qalet li kien ibusilha l-għonq, jitlobha tħaddnu, u jinkoraġġiha titlef il-verġinità tagħha miegħu, waqt li jissuġġerilha tmur għand daru jew tqatta’ ħin waħedha miegħu fuq dgħajsa.
Hi qatt ma aċċettat dawn it-talbiet u qalet li baqgħet taħdem hemm minħabba l-bżonn finanzjarju, minkejja li kienet tibża’ minnu minħabba t-tgergir u r-rabja tiegħu.
Ħabiba tal-vittma kkonfermat li Haber kien jagħmel kummenti mhux xierqa, fosthom jgħid lill-vittma ddur lura meta kienet liebsa bikini, u rat ukoll meta biesha.
Fil-provi tiegħu, Haber ċaħad li messha fuq is-sider, u spjega li l-kuntatt allegat seta’ seħħ biss meta hi mlitet biex terfa’ xi oġġett, u li dan il-kuntatt kien aċċidentali.
Dwar il-bewsa, huwa qal li l-vittma biesitu fuq ħaddejh f’għeluq sninu u ċaħad li dawwar rasu biex ibusu fuq xufftejh — minkejja li ammetta dan waqt l-interrogazzjoni tiegħu. Huwa ċaħad ukoll li qatt stedinha fid-dar tiegħu jew li kellu dgħajsa dak iż-żmien.
Il-qorti qalet li l-akkużat ma ta l-ebda spjegazzjoni sodisfaċenti għall-imġiba tiegħu. Il-pretensjoni tiegħu li l-post tax-xogħol kien ambjent “familjari u ta’ ħbiberija” ma kinitx difiża valida għal fastidju sesswali fuq minorenni.
Il-qorti wkoll irrifjutat l-argument ta’ Haber li kienet il-vittma li bdiet il-kuntatt fiżiku. Hija enfasizzat li l-impjegatur għandu d-dover li jżomm dixxiplina fil-post tax-xogħol u ma jħallix familjarità mhux xierqa.
Għaldaqstant, Haber instab ħati u ngħata sentenza ta’ żewġ snin ħabs sospiżi għal erba’ snin. Ġie wkoll mmultat €7,000 u ordni ta’ protezzjoni ta’ tliet snin saret favur il-vittma.
Barra minn hekk, ismu ġie miżjud mar-Reġistru tal-Persuni Delinkwenti (Offenders Register).
