Raġel ta’ 49 sena minn Marsaskala tpoġġa taħt ordni ta’ probation ta’ tliet snin wara li ammetta li hedded lil missieru ta’ 79 sena b’sikkina waqt argument domestiku.
Il-każ seħħ fl-24 ta’ Settembru meta bejn il-missier u l-iben qam argument li eskala. Skont ix-xhieda tal-missier quddiem il-Pulizija, l-iben tiegħu, magħruf għall-abbuż tal-alkoħol, qallu li se “jpoġġilu s-sikkina f’għonqu” filwaqt li żamm is-sikkina lejh.
Il-missier irrapporta l-inċident lill-Unità tal-Vjolenza Domestika, li mbagħad ħadet l-azzjoni neċessarja.
Quddiem il-qorti, l-akkużat wieġeb ħati għall-akkużi miġjuba kontrih. Id-difiża argumentat li t-theddid seħħ bħala riżultat ta’ binge drinking minħabba stress u rabja, u mhux minħabba alkoħoliżmu kroniku. Il-qorti ntalbet tagħti l-ħelsien mill-arrest, bil-kundizzjoni li l-akkużat joqgħod f’dar oħra u josserva ordni ta’ trattament.
Il-Maġistrat Nadine Sant Lia ħarġet ordni ta’ probation ta’ tliet snin u ordni ta’ trattament relatata mal-abbuż tal-alkoħol, ukoll għal perjodu ta’ tliet snin. Barra minn hekk, ġiet imposta ordni ta’ protezzjoni favur il-vittma għall-istess perjodu. L-akkużat għandu jmur jirrapporta l-qorti kull tliet xhur matul il-perjodu tal-probation.
Il-każ kien ipproċessat mill-Ispettur Christian Cauchi, filwaqt li l-Avukat Roberto Spiteri deher għad-difiża.
