Mara ġiet ikkundannata b’sentenza sospiża wara li ammettiet li għamlet abort.
Il-qorti ġiet infurmata li l-mara ta’ 28 sena marret l-isptar f’Novembru 2024 wara li ħassitha fil-uġigħ, fejn qalet lit-tobba li kienet għamlet abort. Jidher ili l-mara kienet xtrat il-pilloli tal-abort mill-internet.
Il-mara tressqet taħt ċitazzjoni u wieġbet ħatja. Il-qorti tat piena ta’ 22 xahar ħabs, sospiżi għal sentejn.
L-Ispetturi Wayne Buhagiar u Ian Vella ipproċedew. Il-prokuratur legali Peter Paul Zammit deher għall-akkużata.
Doctors for Choice: Il-professjonisti tas-saħħa mhumiex obbligati jirrapportaw każijiet ta’ abort
It-tobba Isabel Stabel u Natalie Psaila Stabile, f’isem Doctors for Choice, qalu li huma diżappuntati bit-tobba fl-Isptar Mater Dei li rrappurtaw lill-pazjenta tagħhom lill-pulizija, fi ksur ċar tal-protezzjoni tad-dejta u l-kunfidenzjalità.
“Il-pazjenti għandhom ikunu jistgħu jafdaw li t-tabib se jaġixxi fl-aħjar interess tagħhom,” huma qalu.
Qalu li Doctors for Choice m’għandhomx kuntatt mal-persuna kkonċernata u li jiddispjaċihom li l-avukat tagħha ma kkunsidrax li jikkuntattjahom biex joffrulha appoġġ.
“Din hija problema reali għax 600 mara kull sena qed jirriskjaw ħajjithom. Il-messaġġ li din is-sentenza tagħti lin-nisa li jagħmlu abort hu li jibqgħu d-dar u jsofru l-konsegwenzi, anke jekk tfisser mewt. Dan hu inaċċettabbli.”
Huma fakkru wkoll lill-professjonisti tal-kura tas-saħħa li m’għandhomx obbligu li jirrapportaw każijiet ta’ abort.
.jpg)
