Il-psikjatra Mark Xuereb u l-eks-boxer internazzjonali Scott Dixon ġew mixlija taħt arrest nhar it-Tnejn b’rabta ma’ sensiela ta’ akkużi relatati mal-falsifikazzjoni ta’ dokumenti u ċertifikati mediċi, kif ukoll b’ksur ta’ obbligi legali u kundizzjonijiet imposti mill-Qorti.
Skont l-akkuża, id-delitti allegatament seħħew bejn Frar 2023 u Mejju 2024, b’Dixon – li ilu fuq ħelsien mill-arrest sa mill-2009 f’każ separat ta’ pussess ta’ droga – qed jiġi akkużat li naqas milli jiffirma l-kondizzjonijiet tal-bail tiegħu għal żmien twil. Meta l-awtoritajiet mexjin biex jarrestawh, huwa ressaq ċertifikati mediċi bl-istamp blu biex jiġġustifika l-assenza tiegħu – iżda dawn iċ-ċertifikati nstabu li kienu foloz.
Skont l-investigaturi, dawn id-dokumenti ġew prodotti mill-psikjatra Xuereb, li huwa wkoll il-fundatur ta’ Crisis Resolution Malta. Bħala uffiċjal pubbliku, huwa qed jiġi akkużat li biddel rekords uffiċjali u għamel dikjarazzjonijiet foloz fil-kors tal-kariga tiegħu biex jikseb benefiċċji illegittimi. Il-prosekuzzjoni talbet lill-Qorti biex tqis miżuri ta’ interdizzjoni ġenerali u skwalifika minn kwalunkwe liċenzja jew awtorizzazzjoni pubblika.
Min-naħa tiegħu, Dixon qed jiffaċċja akkużi li għamel użu minn dokumenti foloz u informazzjoni mhux korretta, fosthom fil-kuntest ta’ identifikazzjoni personali.
Il-Qorti ħelset lil Mark Xuereb b’garanzija personali ta’ €10,000, filwaqt li Scott Dixon ingħata l-ħelsien b’garanzija personali ta’ €12,000 u depożitu ta’ €3,000.
Xuereb qed jiġi rappreżentat mill-avukat Matthew Xuereb, filwaqt li Dixon għandu t-tim legali tiegħu kompost mill-avukati Franco Debono, Adriana Zammit u Michael Schriha.
Il-każ għadu għaddej.
.png)
