Illum jibda l-ġuri fil-każ ta' Simone Grech, tfajla ta' 20 sena mis-Siġġiewi li nstabet mejta bi 17-il daqqa ta' sikkina fit-13 ta' April fl-2005, 17-il sena ilu.
X'sar sa issa: L-għażla tal-ġurati u rendikont tal-każ
Għal dan il-każ intagħżlu 12-il ġurat, disa' attivi fl-awla u tlieta suplenti. Issejħu wkoll żewġ ġurati oħra iżda dawn baqgħu ma dehrux, minkejja n-notifiki. Għaldaqstant dawn ġew immultati €500 kull wieħed.
Wara l-ġurament tal-ħatra nqraw id-dettalji tal-każ fosthom li Grech kienet tagħmel ix-xogħol ta' prosituta biex tħallas għad-drogi li kienet tagħmel użu minnhom. Fiċ-ċrieki tal-prostituzzjoni kienet magħrufa wkoll bħala Sion. Jingħad ukoll li r-relazzjoni ta' Grech u Habesh kienet turbulenti għall-aħħar, fil-fatt kienu jargumentaw diversi drabi fuq droga u flus li kienet taqla' mill-prostituzzjoni. Argument li qam dakinhar tad-delitt.
Fil-Qorti ngħad li meta Grech u Habesh argumentaw, ħebb għal Grech, qabadha minn xagħarha u tefaha mal-art u beda jagħtiha bil-ponn u bis-sieq. Grech kienet mixħuta mal-art tokrob bl-uġigħ. Mahouachi kien fil-karozza sakemm allegatament ħareġ u għen lil sieħbu. Huma qed jiġu akkużati li ġarrewha fl-għalqa, imbagħad qatluha.
L-awtopsja ikkonkludiet li Grech qalgħet minn tal-inqas 17 il-daqqa ta' sikkina, liema daqqiet ikkaġunawlha mewtha.
Iż-żewġ akkużati ċaħdu l-akkużi miġjuba kontrihom.
Kif u meta: Min hi Simone Grech?
Simone Grech, magħrufa preċedentament bħala Simon Grech, instabet mejta f'għalqa ħdejn is-Salib tal-Marsa wara li kienet ilha irrapportata nieqsa mis-7 ta' April 2005. Grech instabet imdawwra bil-ħaxix fi stat ta' dekompożizzjoni. Hija nstabet mill-Pulizija meta ngħatat informazzjoni li Grech kienet tiffrekkwenta dawk l-akkwati minħabba l-prostituzzjoni.
Ismael Habesh issa ta' 51 sena mil-Libja u Faical Mahouachi mit-Tuneżija huma mixlija li qatlu lil Grech. Dakinhar tad-delitt intqal li allegatament Grech kienet qed titlajja għal skopijiet ta' prostituzzjoni meta ġiet avvinċinata miż-żewġ akkużati.
Waqt il-kumpilazzjoni ta' evidenza fis-snin ta' qabel irriżulta li Grech kienet f'relazzjoni ma' Habesh. Ġara li huma kellhom argument hekk kif Grech riditu jitlaq lill-mara tiegħu biex imorru jgħixu flimkien. Aktar kmieni wkoll, ħabiba ta' Grech kienet sostniet li Habesh ma riedx jagħmel dan minħabba l-fatt li ċ-ċittadinanza tiegħu kienet marbuta maż-żwieġ tiegħu, peress li huwa kien miżżewweġ Maltija.
B'hekk huma qed jiġu mixlija li qatlu lil Grech, li kellhom fil-pussess tagħhom sikkina u li Habesh kellu vettura tat-tip Ford Escord misruqa.
