Raġel mill-Għargħur tressaq il-Qorti akkużat li hedded lill-eks mara tiegħu li kien se jispara fuq tlett itfal, inkluż bintu li għad għandha biss għaxar snin. Jidher li r-raġel hedded lil martu waqt argument bejniethom li seħħ ilbieraħ.
Ir-raġel li għandu 37 sena tressaq il-Qorti dalgħodu akkużat li żamm lil bintu ta’ għaxar snin u anke tfajla ta’ 15-il sena li jiffosterja u l-ħabiba tagħha kontra r-rieda tagħhom.
Huwa kien akkużat ukoll li weġġa’ ħafif lit-tfajla ta’ 15-il sena, li attakka lill-mara tiegħu u li kien qed iġorr fuqu arma tan-nar kontra l-liċenzja li huwa għandu. Dan fost akkużi oħra.
Jidher li l-koppja jinsabu waqt proċeduri ta’ separazzjoni. Ir-raġel kien għadu kemm tefa’ lil martu barra mid-dar u aktar tard ċemplilha biex tmur lura iżda hi ma riditx.
Kien hawn li r-raġel hedded lil martu li kien lest jispara u joqtol lit-tfal.
L-Ispettur li ressaq lir-raġel qal li meta waslu l-Pulizija, wara r-rapport li rċevew, it-tfal irnexxielhom jaħarbu mid-dar u seta’ jinnota kif ħadu r-ruħ.
Minħabba n-natura tal-każ u anke għax it-tfal għadhom se jixhdu, il-Qorti ma tatx il-ħelsien mill-arrest lill-akkuża.
Intant, il-Qorti ġiet infurmata mid-Difiża li r-raġel qed jirċievi kura psikjatrika u għalhekk il-Maġistrat ordnat li r-raġel jingħata b’mod immedjat il-kura kollha li għandu bżonn.