Mara ta' 48 sena li attakkat lil mara oħra, tant li weġġatha serjament, saħqet li kellha problemi ta' saħħa mentali waqt il-ħin tal-attakk. Jidher li din il-mara minn Marsaskala ġiet irrappurtatha lill-Pulizija minn binha stess.
L-Ispetturi Kurt Farrugia u Darren Fabri qalu fil-Qorti li f'Diċembru li għadda l-puliżija rċivew l-informazzjoni minn iben l-akkużata li jindika li aggrediet lil din il-mara. Meta l-Puliżija marru fuq il-post sabu li din il-mara kienet fi stat mentali ħażin tant li ttieħdet l-Isptar Monte Karmeli biex tirkupra. Aktar tard hija rkuprat u ġiet iċċertifikata li tista' tiġi interrogata.
L-akkużata ma weġbitx meta ġiet mistoqsija jekk hux ħatja jew le. Għalhekk l-avukat Christopher Chircop qal lill-Qorti li ma kinitx se twieġeb għaliex fil-mument tal-attakk kellha problemi ta' saħħa mentali. Huwa talab lill-Qorti biex taħtar esperti psikjatriċi biex jistabilixxu jekk kinitx f'sikkitha meta għamlet l-attakk.
Jidher li l-ħelsien minn l-arrest ma ntalabx iżda minflok id-difiża talbet lill-Qorti tordna lid-Direttur tal-Ħabs biex jiżgura li l-akkużata tinżamm "f'istituzzjoni li tħares lilha u l-bżonnijiet tagħha."
Il-Qorti ġiet infurmata wkoll li l-akkużata fl-aħħar jiem, b'mod volontarju, daħlet f'faċilità għal aktar għajnuna.