Raġel ta' 38 sena minn Tas-Sliema inżamm taħt arrest wara illi ammetta illi seraq muturi u oġġetti oħrajn li huma ta' missieru li miet ftit ilu, sabiex ikun jista' jħallas għall-vizzju tad-droga tiegħu.
Ir-raġel li ma jaħdimx deher quddiem il-Maġistrat Donatello Frendo Dimech u tressaq mill-Ispettur Jessica Bezzina fuq akkużi ta' serq aggravat.
Fost affarijiet oħrajn li seraq ukoll kien hemm sett tat-televixin ta' 32 pulzier kif ukoll tliet klieb.
L-akkużat kien arrestat wara li ommu stess irrappurtatu lill-pulizija.
Quddiem il-Qorti dalgħodu huwa ammetta l-ħtija filwaqt li apoloġizza u qal illi hu jsofri mid-dipressjoni.
Il-Qorti ipposponiet il-każ għall-ġimgħa d-dieħla meta tagħti s-sentenza għalkemm innutat li r-raġel kien qed iħalli lit-traffikanti jagħmlu l-flus minn fuq daharu.
L-Avukat Mark Mifsud mexxa d-Difiża.