Raġel ta’ 30 sena nżamm arrestat wara li tressaq akkużat li ta daqqa ta’ ponn lis-sieħba tiegħu wara ġlieda fil-karozza.
Huwa wieġeb mhux ħati tal-akkużi miġjuba kontrih.
L-Ispettur Robert Vella spjega kif l-inċident seħħ ilbieraħ għall-ħabta tal-11:30pm fil-Marsa ftit wara li telqu minn party.
Jidher li l-akkużat kien qed isuq il-karozza tal-mara meta kellhom xi jgħidu u r-raġel refa’ idejh fuqha.
Wara l-ġlieda, il-mara telqet bil-karozza u hu kompla bil-mixi.
Meta kienet qed issuq, il-mara twaqqfet minn road block u qalet kollox lill-Pulizija.
L-Avukat tad-Difiża talbet il-ħelsien mill-arrest waqt li saħqet li dan mhux każ normali ta’ vjolenza domestika.
Fi kliemha, l-akkużat ipprova jitlaq diversi drabi, iżda l-mara dejjem ikkonvinċitu biex jibqa’
Meta ddeċieda li jitlaqa’, il-mara baqgħet iċċempillu.
“Iltaqgħu lbieraħ u seħħet il-ġlieda. Hija tatu daqqa f’għajnejh u hu mbuttaha. Telaq mill-karozza u kompla bil-mixi sakemm ġabru missieru u ħadu fid-dar tagħhom,” qalet l-Avukat. “Huwa ma jridx jerġa’ jiltaqa’ magħha.
Madanakollu, minkejja n-natura tal-akkużi, il-Qorti ordnat li jinżamm arrestat.