Il-Partit Nazzjonalista qed jipprova jnaqqas l-impatt politiku u pubbliku ta’ laqgħa bejn il-kap tiegħu Alex Borg u l-eks deputat Edwin Vassallo – figura magħrufa għall-pożizzjonijiet konservattivi tiegħu u għall-oppożizzjoni dejjiema għal numru ta’ riformi soċjali li għaddew mill-parlament matul l-aħħar snin.
Il-gazzetta oħt, MaltaToday żvelat nhar l-Erbgħa li Vassallo, fl-2022 falla milli jerġa’ jiġi elett wara 25 sena fil-Parlament, jidher li reġa’ ressaq ruħu lejn il-PN wara laqgħa ma’ Borg. Huwa stqarr li offra l-ħin tiegħu lill-partit sabiex, fi kliemu, “ma nibqgħux kompliċi fit-tilqit u l-qerda tal-pajjiż”.
Iżda l-PN qed jinsisti li din il-laqgħa ma għandhiex tinftiehem bħala sinjal ta’ bidla fid-direzzjoni politika tal-partit, b’kelliem jgħid lil MaltaToday li “laqgħa ma’ Edwin Vassallo ma tistabbilixxi l-ebda politika”. Il-kelliem żied li Alex Borg ltaqa’ ma’ Vassallo b’relazzjoni ta’ rispett bħalma ltaqa’ ma’ bosta oħrajn li kienu fil-partit fil-passat, u li l-għan tiegħu hu li jressaq lura elementi u fazzjonijiet li kienu sfaxxaw fl-aħħar snin. Dan, skont il-PN, ma jfissirx li l-kap tiegħu jaqbel mal-fehmiet li Vassallo kien jippromwovi.
Il-partit insista li l-kap tiegħu qatt ma ħaddan politika ta’ esklużjoni u li hu jemmen fid-djalogu u l-konvinzjoni. F’każ li Vassallo jixtieq uffiċjalment jerġa’ jingħaqad mal-PN, intqal li hemm linja ċara li l-membri kollha jridu jimxu magħha u li hija dik approvata mill-istituzzjonijiet tal-partit.
Vassallo jibqa’ figura prominenti tal-konservatiżmu politiku Malti. Matul il-karriera tiegħu kien dejjem esprima l-oppożizzjoni tiegħu għal riformi bħad-divorzju qabel l-2011 u l-introduzzjoni taż-żwieġ bejn persuni tal-istess sess fl-2017, meta kien l-uniku deputat li vvota kontrihom. Sena wara, ivvota kontra l-abbozz dwar il-vjolenza domestika għax sostna li kellu jikkundanna b’mod espliċitu kwalunkwe tip ta’ abort.
Fl-2019, huwa qassam "twissija" dwar il-banana injettata b'"demm li fih l-HIV u l-AIDS" fuq il-profil personali tiegħu, u sostna "Dan huwa Sataniżmu". Eventwalment skuża ruħu talli qasam l-aħbarijiet foloz.
Wara li ma ġiex elett fl-2022, ħabbar it-tluq tiegħu mill-PN u waqqaf Moviment Solidarjetà, bil-għan li jkompli jippromwovi l-aġenda konservattiva tiegħu barra l-istrutturi tal-partit li kien ilu jappartjeni għalih għal kwart ta’ seklu.
Il-laqgħa ta’ Borg ma’ Vassallo qed tinqara bħala parti minn strateġija usa’ tal-kap il-ġdid tal-PN biex jirkupra u jlaħħaq mal-firda interna li ħalliet l-oppożizzjoni dgħajfa u mifruda. Madankollu, il-prossimità ma’ figura li għal ħafna tissimbolizza pożizzjonijiet li jmorru kontra d-drittijiet ċivili tqajjem ukoll mistoqsijiet serji dwar jekk il-PN hux qed jikkunsidra li jerġa’ jwieżen elementi konservattivi li kienu tneħħew jew inżammu ’l bogħod fil-passat riċenti.
