Id-Deputat Prim Ministru Ian Borg sejjaħ lill-partit tiegħu biex ikun aħjar fil-mod kif jipprova jifhem il-bżonnijiet dejjem jinbidlu tas-soċjetà.
Borg kien qed jitkellem bħala d-Deputat Mexxej tal-Partit Laburista għall-affarijiet parlamentari waqt li indirizza l-konferenza ġenerali annwali tal-partit nhar il-Ġimgħa filgħaxija.
Hu qal lill-membri tal-partit fil-Ħamrun li ħafna minn dawk fil-istrutturi tal-partit għandhom it-tendenza li jittraskuraw jew iċekknu l-“ilmenti” tan-nies, iżda dan m’għandux ikun il-każ.
Id-diskors ta’ Ian Borg kien wieħed serju, speċjalment fid-dawl ta’ żviluppi riċenti fil-Partit Laburista.
Ftit sigħat qabel ma Borg indirizza lill-membri tal-PL, is-segretarju eżekuttiv tat-taqsima tan-nisa tal-partit qalet lil gazzetta oħt, MaltaToday li rriżenjat mill-kariga tagħha wara attakki personali, kif ukoll minħabba r-riformi proposti mill-gvern fil-qasam tal-ippjanar.
Aktar kmieni din il-ġimgħa, dan il-gazzett staqsa lill-Prim Ministru Robert Abela dwar il-blog post ta’ Neville Gafà fejn sejjaħ lil Tabone “velenuża bi kliema,” iżda Abela rrifjuta li jikkundanna tali kummenti.
Nhar il-Ġimgħa, Ian Borg enfasizza quddiem il-membri tal-partit li l-PL irid jitgħallem mill-iżbalji tiegħu u jevita d-diskriminazzjoni politika. Żied jgħid li l-membri tal-partit, speċjalment dawk li jaħdmu fil-gvern, għandhom jaħdmu għall-ġid tal-pajjiż qabel kollox.
B’mod ġenerali, Borg qal lil dawk preżenti li f’pajjiż daqshekk żgħir, wieħed irid jitgħallem jgħix u jittollera lin-nies ta’ madwaru.
Borg ħa wkoll il-ħin biex jitkellem dwar il-politika barranija ta’ Malta, fejn saħaq li n-newtralità tal-pajjiż qatt m’għandha tiġi kompromessa.
“Għandna nżommu l-aħjar relazzjonijiet possibbli mal-Istati Uniti, iċ-Ċina u l-Afrika ta’ Fuq,” qal Borg, u żied jgħid li l-interess ta’ Malta jista’ jinħares biss mill-Maltin stess.
.png)
