Il-Kumitat Parlamentari tal-Kontijiet tal-Uffiċċju Nazzjonali tal-Verifika (NAO) iddeċieda b’mod unanimu li jagħti żmien ta’ xahrejn lill-Awtorità tal-Artijiet biex tħejji rapport ġdid dwar l-istima relatata mat-tneħħija ta’ kundizzjonijiet fuq art pubblika akkwistata mill-Grupp Fortina fl-2019.
Id-deċiżjoni ttieħdet nhar it-Tnejn mill-kumitat, li ġie kkummissjonat mid-Deputat Prim Ministru Ian Borg f’Settembru, ftit wara li l-Uffiċċju Nazzjonali tal-Verifika (NAO) ppubblika l-investigazzjoni tiegħu dwar il-ftehim tal-Fortina.
L-NAO sab li l-Grupp Fortina ħallas inqas minn nofs is-somma dovuta biex jitneħħew il-kundizzjonijiet fuq bosta biċċiet ta’ art pubblika li kellu f’idejh. Fortina ħallset €8.1 miljun, iżda rapport ta’ stima li kien inżamm moħbi mill-eks chairman tal-Awtorità tal-Artijiet, Lino Farrugia Sacco (issa mejjet), kien jivvaluta s-somma għal aktar mid-doppju ta’ dak li tħallas.
Persuna oħra li kienet taf b’dan ir-rapport kienet Keith Schembri, l-eks kap tal-istaff fl-Uffiċċju tal-Prim Ministru. L-investigazzjoni tal-NAO żvelat li l-firma tal-awditjar kienet ġiet istrwita biex tibgħat il-kont tagħha lill-Uffiċċju tal-Prim Ministru minflok lill-Awtorità tal-Artijiet.
Schembri qal lill-NAO li ma jiftakarx x’kien ir-rwol eżatt tiegħu f’dan il-ftehim.
Matul il-laqgħa tat-Tnejn, kien preżenti l-Awditur Ġenerali Charles Deguara u l-Kap Eżekuttiv tal-Awtorità tal-Artijiet, Robert Vella.
Borg, li jmexxi l-kumitat, deher li kellu xi riżervi dwar il-fatt li l-NAO kien ħatar arkitet wieħed biss biex jiddetermina l-valur tal-art. L-uffiċċju tal-NAO wieġeb li l-investigazzjonijiet tiegħu huma differenti minn dawk tal-Awtorità tal-Artijiet, u li hija din l-awtorità li hija marbuta b’dawn ir-rekwiżiti.
Il-kumitat iddeċieda b’mod unanimu li jagħti żmien ta’ xahrejn lill-Awtorità tal-Artijiet biex tħejji r-rapport il-ġdid tagħha.
