L-eks editur ta’ ONE News, Sandro Mangion, qal li kien ixxokkjat li Prim Ministru “soċjalista” juża l-ksenofobija biex jopponi abbozz tal-PN, u sejjaħ lil Abela biex jitħalla jiġi kkonsultat minn nies soċjalisti u demokratiċi, mhux minn dawk tal-lemin.
Sandro Mangion qal li baqa’ bla kliem meta sema’ lil Prim Ministru Robert Abela juża l-biża’ mill-barranin bħala skuża biex jiġġustifika l-oppożizzjoni tal-gvern għall-proposta kostituzzjonali tal-PN.
Il-Ħadd li għadda, Abela kien irrefera għad-deċiżjoni tal-gvern li jopponi abbozz tal-PN li kien jippromwovi d-dritt għal ambjent b’saħħtu u sostenibbli fil-Kostituzzjoni.
Fil-kumment tiegħu, Abela ħoloq eżempju fittizju ta’ barrani jgħix f’Malta li jkun infurjat bil-festa tal-irħula u jfittex rimedju kostituzzjonali biex iwaqqafha, fuq il-bażi li tikser id-dritt tiegħu għal ambjent b’saħħtu.
Mangion irrakkonta li kien f’kumpanija ta’ ħbieb barranin f’Malta, meta semgħu deputat tal-PN (li ma semmiex ismu) jitkellem kontra l-barranin.
Il-MP kien qed jikkritika l-fatt li kull min jinsab legalment f’Malta għandu d-dritt juża s-servizzi mediċi mħallsa mit-taxxi tal-Maltin.
Dan ma niżel tajjeb xejn ma’ wieħed mill-ħbieb barranin tiegħu, li fakkru li hu wkoll iħallas it-taxxi.
Mangion qal li kien qed jisma’ stazzjon tar-radju li jappartjeni lil partit tal-lemin, u spjega lill-ħabib tiegħu li l-partit fil-gvern hu wieħed soċjalista, fuq ix-xellug, li jirrispetta lin-nies kollha irrispettivament minn fejn ġejjin.
“Imma llum kelli nibla’ kliemi,” qal Mangion.
Huwa qal li ma setax jemmen kif Abela pprova jpinġi lill-ħaddiema barranin bħala “theddida għat-tradizzjonijiet tagħna,” u żied jgħid li seta’ għamel l-istess punt mingħajr ma jmur kontra l-barranin.
Mangion temm jgħid li Abela għandu jħalli nies soċjalisti u demokratiċi jagħtuh pariri, mhux nies tal-lemin.
“U ftit empatija ma’ settur vulnerabbli tas-soċjetà żgur ma tagħmel ħsara lil ħadd.”
.png)
