Fl-ewwel jum ta’ votazzjoni bikrija għall-elezzjoni tal-Kap il-Partit Nazzjonalista, 15 fil-mija tal-membri eliġibbli diġà għaddew il-vot tagħhom.
Il-votazzjoni saret bejn l-4pm u d-9pm fid-Dar Ċentrali tal-Partit Nazzjonalista f’Tal-Pietà, filwaqt li fil-Kumpless Sub-Headquarters tal-PN f’Ta’ Sannat, Għawdex, il-proċess dam bejn l-4pm u t-8pm.
Il-proċess tal-votazzjoni beda wara li l-President tal-Kunsill Ġenerali tal-PN, Mark Anthony Sammut, iddikjara miftuħ il-Konvenzjoni Ġenerali tat-tesserati, kif jipprovdi l-istatut tal-partit. Permezz ta’ din il-konvenzjoni, il-membri se jagħżlu l-Kap il-ġdid tal-Partit.
Il-Kummissjoni Elettorali, tar-Rekords u tad-Data tal-PN fakkret lill-membri li l-votazzjoni bikrija se tkompli nhar is-Sibt 30 ta’ Awwissu, filwaqt li s-sessjoni finali tal-konvenzjoni se ssir is-Sibt 6 ta’ Settembru – jum l-elezzjoni uffiċjali.
Minn informazzjoni miksuba mill-partit, jirriżulta li hemm madwar 20,600 membru, magħrufa bħala t-tesserati, eliġibbli biex jivvutaw f’din l-elezzjoni. Il-ġlieda għall-kariga ta’ Kap qed issir bejn iż-żewġ kandidati Alex Borg u Adrian Delia.
