Il-Kummissarju tal-Istandards Joseph Azzopardi sab lill-Ministru Chris Bonett ħati li kiser il-kodiċi etiċi tal-Parlament wara li ħareġ stqarrija tal-gvern b’kontenut partiġjan kontra l-Partit Nazzjonalista.
Il-każ jikkonċerna stqarrija uffiċjali li kienet ippubblikata permezz tad-Dipartiment tal-Informazzjoni (DOI), bħala reazzjoni għal konferenza tal-aħbarijiet organizzata mill-Partit Nazzjonalista dwar il-ġestjoni tat-traffiku.
L-ilment kien ġie ppreżentat f’Lulju mill-MPs Nazzjonalisti Mark Anthony Sammut u Joe Giglio, li kienu tkellmu waqt il-konferenza tal-aħbarijiet. Sammut sostna li Bonett naqset milli jżomm il-kariga tiegħu ta’ ministru separata minn dik ta’ politiku tal-partit u li uża ħażin ir-riżorsi tal-Istat għall-propaganda partiġġjana minflok għal informazzjoni fattwali.
Fuq Facebook, Sammut insista li r-referenza tar-rapport lill-Kumitat Parlamentari għall-Istandards fil-Ħajja Pubblika tikkonferma li l-Kummissarju sab lil Bonett f’ksur tal-kodiċi.
Ir-rapport tal-Kummissarju issa ntbagħat quddiem il-Kumitat għall-Istandards biex ikun ikkunsidrat aktar u possibilment tittieħed azzjoni. Sammut ħabbar li ser jirrikuża ruħu mid-diskussjonijiet tal-Kumitat, billi l-ilment oriġina minn konferenza li kien ippreżenta hu stess. Dan sabiex il-Kap tal-Oppożizzjoni jkun jista’ jinnomina membru ieħor minfloku.
“Din hija l-korretezza politika li jixraq li ssir,” kiteb Sammut.
Din mhijiex l-ewwel darba li Kummissarju tal-Istandards sab ministru f’ksur tal-kodiċi etiċi minħabba stqarrija partiġġjana. F’Settembru li għadda, il-Ministru Miriam Dalli kienet ukoll instabet li kisret il-kodiċi fuq każ simili, iżda l-Kummissarju kien ikkunsidra l-każ magħluq wara li l-Ministru skużat ruħha.
