Skont il-Partit Nazzjonalista, il-miżuri tal-Ministru tat-Traffiku Chris Bonett biex isolvi l-problemi tat-traffiku għadhom ma ġewx implimentati kif kien mistenni, anzi ħafna minn dawn il-miżuri għadhom f’sitwazzjoni ta’ stagnazzjoni.
Filwaqt li l-Ministru Bonett għamel preżentazzjoni f’April fejn wiegħed li sewwieqa li jkunu lesti jċedu l-liċenzja tagħhom għal ħames snin jingħataw €25,000, dan il-benefiċċju ġie deskritt bħala proġett pilota li għadu mhux fis-seħħ u mingħajr indikazzjoni ċara ta’ min se jkun eliġibbli għalih, skont ix-Shadow Minister tat-Trasport u l-Mobbiltà, Mark Anthony Sammut, u x-Shadow Minister għall-Infrastruttura u l-Proġetti Kapitali, Joe Giglio.
Il-PN sostna wkoll li l-wegħda biex is-servizz tal-ferry lejn Għawdex li jieqaf Buġibba jibda dan is-sajf għadha ma ġietx implimentata.
Sammut u Giglio żiedu jgħidu li wara kritika u pressjoni mill-Oppożizzjoni, il-Ministru Bonett kien irid jagħmel bidla f’miżura oħra li kellha tgħolli l-eta’ tal-vetturi biex jitqiesu bħala vintage minn 30 għal 35 sena, u dan kien segwit minn “U-turn”.
Il-Partit Nazzjonalista esprima wkoll tħassib dwar il-kaos fit-traffiku f’inħawi bħas-San Ġiljan, San Pawl il-Baħar, il-Mellieħa u ċ-Ċirkewwa, fejn xogħlijiet infrastrutturali jdumu ġimgħat u xhur, u fejn jidher nuqqas ta’ koordinazzjoni bejn l-awtoritajiet tal-Gvern.
Min-naħa tiegħu, il-Ministru tat-Trasport ħabbar li kien qed jinħoloq unit ġdid biex jinvestiga l-inċidenti tat-traffiku, għalkemm il-Partit Nazzjonalista enfasizza li l-Pulizija diġà kellha unit simili li nħoloq ftit ġimgħat qabel.
Huma qalu li biex tissolva l-problema tat-traffiku hemm bżonn pjan sħiħ li jinkludi diversi miżuri flimkien, fosthom sistemi ta’ trasport tal-massa u titjib fis-servizz tat-trasport pubbliku.
Fi kliemhom, il-Gvern għandu juri rieda serja biex joffri soluzzjonijiet sostenibbli li jtejbu l-kwalità tal-ħajja għal Maltin u Għawdxin.
