Jidher illi bħalissa qed joperaw ’il fuq minn 5,500 vettura li għandhom il-pjanċi tagħhom jispiċċaw, jew b’“GY”, jew b’“LY”.
Din l-informazzjoni ttieħdet minn mistoqsija parlamentari magħmula mill-Kelliem tal-Oppożizzjoni għat-Trasport u l-Mobbiltà Mark Anthony Sammut lill-Ministru għat-Trasport, l-Infrastruttura u x-Xogħlijiet Pubbliċi Chris Bonett.
Fil-mistoqsija tiegħu, Sammut talab lill-Ministru jistax “jaġġorna l-lista sħiħa tal-pjanċi tal-vetturi li jispiċċaw bl-ittri “GY” u “LY”.
Fit-tweġiba tiegħu, il-Ministru ta l-informazzjoni mitluba f’forma ta’ tabella bil-pjanċi kollha rreġistrati li jispiċċaw bl-ittri msemmijin.
5,554 taxi bil-pjanċi jispiċċaw “GY” u “LY” li qed joperaw attivament
Mit-tabella pprovduta, jidher li b’kollox hemm 5,554 vettura li għandhom il-pjanċi jispiċċaw “GY” u “LY” — fi kliem ieħor, taxis impjegati ma’ kumpaniji tal-ivvjaġġar bħalm’huma l-Bolt u l-eCabs.
Iżda dan ifisser li n-numru veru ta’ taxis inġenerali li qed joperaw fil-gżejjer Maltin huwa ikbar.
Dan għaliex dil-mistoqsija parlamentari tindirizza biss vetturi li għandhom pjanċi jispiċċa b’“GY” jew b’“LY”, iżda taxis oħrajn jużaw pjanċi differenti.
Eżempju, it-taxis bojod, bħal kif inhuma magħrufin, għandhom pjanċi differenti li ġeneralment jibdew bil-kelma “TAXI”.
119-il vettura bil-pjanċi jispiċċaw “GY” u “LY” iggaraxxjati jew bil-liċenzja skaduta
Apparti hekk, mill-informazzjoni mogħtija fil-Parlament, jidher li hemm ukoll 119-il vettura bil-pjanċi jispiċċaw “GY” u “LY” li “huma ggaraxxjati jew inkella li l-liċenzja taċ-ċirkulazzjoni tagħhom kienet diġà skadiet sa minn qabel id-dħul fis-seħħ tal-Legiżlazzjoni Sussidjarja 499.68,” fi kliem il-Ministru Bonett.
Il-leġiżlazzjoni msemmija, li ġġorr l-isem “Regolamenti Dwar Servizzi ta’ Ġarr ta’ Passiġġieri b’Vetturi Żgħar u Servizzi ta’ Kiri ta’ Vetturi”, tirregola l-awtorizzazzjoni ta’ servizzi ta’ ġarr ta’ passiġġieri.
Fi kliem ieħor, din il-leġiżlazzjoni tirregola lit-taxis. Minn meta daħlet fis-seħħ, kien hemm iktar regolarizzazzjoni ta’ dawn il-vetturi u l-operaturi tagħhom.
