L-espert ewlieni ta’ Malta dwar il-Vatikan jemmen li l-Kardinal Mario Grech għandu vantaġġ qabel il-konklavi minħabba l-viżibbiltà li għandu fost il-kardinali minn pajjiżi barra l-Ewropa.
Frank Zammit, l-Ambaxxatur ta’ Malta għall-Vatikan, ta ħarsa lejn iċ-ċansijiet ta’ Grech waqt intervista fuq il-programm Xtra fuq TVM. Hu qal li minn meta l-Papa Franġisku estenda l-konklavi biex jinkludi aktar kardinali minn pajjiżi tal-Nofsinhar Dinji, l-għażla ta’ papa ġdid saret aktar diffiċli biex tbassarha.
“Mario Grech ivvjaġġa ħafna, hekk kif ġie mitlub mill-Papa biex speċifikament iżur l-Ażja, il-Paċifiku u l-Amerika t’Isfel, u għalhekk ħafna kardinali jafu bih u mhux lil dawk li baqgħu Ruma,” qal Zammit.
Zammit sostna li Grech għandu l-vantaġġ li ltaqa’ u żviluppa relazzjonijiet personali ma’ kardinali minn pajjiżi mhux Ewropej, mhux bħall-kandidati l-oħrajn. Madankollu, huwa qal ukoll li l-attenzjoni fil-midja mhux dejjem tkun ta' ġid.
“Iktar kemm jissemma fil-midja, iktar agħar għal kandidat,” qal.
Zammit faħħar ħafna lill-Papa Franġisku, li ddeskrivieh bħala persuna ġentili, simpatika, u qrib in-nies, iżda strett u eżiġenti fejn tidħol il-Kurja.
Hu qal ukoll li l-Papa kien bla ħniena mal-membri tal-kleru li kienu akkużati bi mġiba ħażina jew delitt. Zammit żied jgħid li l-Papa kellu interess partikolari fil-foqra u l-emarġinati, u jemmen li l-papa li jmiss irid ikompli jżomm dan l-impenn ħaj.
Meta mistoqsi għal xi esperjenza personali mal-Papa, Zammit irrakkonta dwar l-interess personali li l-Papa wera lejn il-familja tiegħu. Hu qal li l-Papa wera tħassib ġenwin meta sar jaf li bintu għaddiet minn perjodu diffiċli ta’ vizzju tad-droga. “Kien jistaqsini inkwietat dwarha,” qal Zammit b’għajnejh miksurin.
Fil-programm, Zammit poġġa fuq il-mejda żewġ papalini (kpiepel liturġiċi): wieħed tal-Papa u l-ieħor ta’ kardinal. “Dawn tawhomli l-Papa Franġisku u l-Kardinal Sodano, it-tnejn ħallewna issa. Għandi oħrajn, imma tajthom lil postijiet fejn hemm bżonn tal-barka tagħhom, bħall-ħabs ta’ Kordin.”
