GTA tgħid li sabet inkwetanti l-oppożizzjoni tal-Kunsill Lokali tax-Xewkija għal mitjar fil-lokalità

L-Assoċazzjoni għat-Turiżmu f’Għawdex (GTA) esprimiet is-sorpriża tagħha rigward l-oppożizzjoni tal-Kunsill Lokali tax-Xewkija għall-iżvilupp ta’ ajruport rurali f’Ta’ Lambert, fix-Xewkija.

Fi stqarrija li ħarġet it-Tlieta, il-GTA staqsiet għala l-kunsill qed joġġezzjona issa, meta kien hemm bosta opportunitajiet għad-diskussjoni matul il-proċess ta’ konsultazzjoni pubblika.

Huma fakkru kif l-Awtorità għar-Reġjun ta’ Għawdex (GRDA) kienet organizzat laqgħa fis-16 ta’ Mejju 2022 mal-Kunsill Lokali tax-Xewkija biex jiġu diskussi l-implikazzjonijiet ekonomiċi, soċjali u ambjentali tal-proġett tal-ajruport. Barra minn hekk, żewġ konsultazzjonijiet pubbliċi saru f’Mejju 2022, li taw lill-abitanti u partijiet interessati ċ-ċans li jaqsmu l-preokkupazzjonijiet u s-suġġerimenti tagħhom.

"GTA temmen li l-Għawdxin kollha, irrispettivament mill-kulur politiku tagħhom, għandhom jappoġġjaw inizjattivi li jsaħħu u jtejbu l-konnettività bejn Malta u Għawdex," qalet il-GTA. Huma saħqu li Għawdex m’għandux jitlef il-vantaġġi li tali faċilità tista’ ġġib magħha.

L-assoċjazzjoni temmet billi appellat lill-politiċi biex iwaqqfu l-“ġlied politiku” rigward il-konnettività bl-ajru, u enfasizzat il-bżonn ta’ appoġġ magħqud għal proġetti infrastrutturali li jistgħu jtejbu l-aċċess għal Għawdex.