Servizz ġdid ta’ vapur bejn Għawdex u Tas-Sliema b'waqfa f’Buġibba

Il-Gvern ħabbar li se joħroġ sejħa għall-offerti għal servizz ġdid ta’ vapur li se jgħaqqad lil Għawdex ma’ Tas-Sliema, b’waqfa f'Buġibba. Il-vjaġġi bejn Buġibba u Tas-Sliema se jkunu offruti b’xejn, b’mira li jkomplu jħeġġu aktar nies jużaw dan il-mod alternattiv ta’ trasport.

L-inizjattiva hija parti minn strateġija aktar wiesgħa biex ittejjeb it-trasport bil-baħar madwar Malta, u mhux biss bejn il-portijiet ewlenin. L-għan hu li jitkabbar l-aċċess għal mezzi ta’ trasport sostenibbli li jgħaqqdu lokalitajiet oħra madwar il-kosta.

Is-servizz il-ġdid se jkun jista’ jibda jopera grazzi għall-infrastruttura l-ġdida f’Buġibba, fejn tlesta dan l-aħħar breakwater modern. Il-proġett jinkludi struttura prinċipali ta’ 180 metru biex tonqos l-intensità tal-mewġ u tipproteġi l-bastimenti, kif ukoll arma oħra ta’ 36 metru għal aktar kenn. Il-punt ta’ tluq u nżul tal-passiġġieri huwa mgħammar bi spazji ta’ stennija u faċilitajiet għall-pubbliku.

Ritratt: Robert Abela

Dan l-investiment laħaq il-€14-il miljun, b’ammont sinifikanti finanzjat minn fondi Ewropej. Il-breakwater ġie inawgurat mill-Prim Ministru Robert Abela nhar l-Erbgħa, fejn saħaq li l-infiq totali fuq proġetti kapitali matul din is-sena mistenni jaqbeż il-€1 biljun. Huwa enfasizza li dawn il-fondi se jintużaw biex jipprovdu benefiċċji konkreti għall-pubbliku.

Il-Ministru għat-Trasport, Chris Bonett, qal li dan il-proġett huwa pass ieħor lejn il-viżjoni tal-Gvern li jtejjeb il-konnettività marittima. Huwa nnota li fl-aħħar snin kien hemm żieda ċara fin-nies li jagħżlu t-trasport bil-baħar bħala mezz ta’ mobilità.

Min-naħa tiegħu, il-Ministru għall-Fondi Ewropej, Stefan Zrinzo Azzopardi, spjega li dan l-investiment jagħmel parti mill-programm SMITHS — inizjattiva li tinkludi proġetti li jippromwovu trasport nadif u alternattiv kemm f’Malta kif ukoll f’Għawdex. L-iskop hu li jiżdiedu l-għażliet għall-vjaġġar, jitnaqqas it-traffiku, u jiġi ffaċilitat moviment iktar sostenibbli fost il-komunitajiet.