Borg jikkundana l-użu tal-forza kontra dimostranti fit-toroq ta' Ġeorġja

Jindirizza l-protesti paċifiċi, Ian Borg, iċ-Chairperson tal-OSCE u l-Ministru għall-Affarijiet Barranin, ikkundanna l-użu tal-forza kontra d-dimostranti.

Fl-indirizz tiegħu fi Tbilisi, il-Ġeorġja, Borg qal li l-aggressjoni u l-intimidazzjoni mhux lokhom ma’ dimostranti li jkunu qed jeżerċitaw dritt bażiku tagħhom.

In a statement in #Tbilisi, Chair-in-Office of the @OSCE @MinisterIanBorg underscored that "human rights and fundamental freedoms, including the right to peaceful assembly and demonstration, are not negotiable. These inalienable rights are not only central to the OSCE but are… pic.twitter.com/DO6MizVOIa

— MALTA - OSCE24 (@OSCE24MT) May 15, 2024

Borg qal li d-drittijiet tal-bniedem u l-libertajiet fundamentali, fosthom dak li wieħed jipprotesta b’mod paċifiku, m’humiex negozzjabbli.

Żied jgħid, li dawn id-drittijiet huma ta’ prijorità għall-OSCE u huma essenzjali f’kull soċjetà demokratika.

In-nies ħadu t-toroq fi protesti kontra liġi li bosta ċittadini qed iqisuha “imposta mir-Russja,” minħabba l-mod kif thedded id-demokrazija u l-libertà tal-kelma, kif ukoll l-aspirazzjoni tal-pajjiż li jissieħeb fl-Unjoni Ewropea.

Il-liġi inkwistjoni qed titlob lill-midja, u l-organizzazzjonijiet mhux governattivi u dawk mhux kummerċjali jirreġistraw ruħhom bħala entitajiet barranin, f’każ li aktar minn 20% tal-finanzjament tagħhom, jiġi minn barra l-pajjiż.

Fil-Ġeorġja, il-Ministru Borg kellu għadd ta’ laqgħat mal-awtoritajiet tal-pajjiż u tal-Unjoni Ewropea, u m’organizzazzjonijiet ċivili. Iż-żjara ssegwi oħra fl-Armenja u fl-Ażerbajġan.